Generashon nobo ku táktika bieu di odio kontra LGBTQ+

E siman aki un hende ku tabata defendé esnan ku ta sufri pa motibu di e kondishonnan ekonómiko pésimo, den su rabia kontra Gobièrnu, ta skupi odio kontra LGBTQ+. Ku ki outoridat moral ta lucha na fabor di un grupo vulnerabel mientras den mesun rosea ta lastra un otro grupo, tambe vulnerabel?

Ta ampliamente konosí ku LGBTQ+, kontrali na otronan, te awe no tin e mesun derechinan legal. Tambe ta un echo ku nan ta sufri desproporshonalmente di diskriminashon, ‘bullying’ i konosé mas suisidio ku kualkier otro segmento den nos komunidat. LGBTQ+ ta hiba e mesun lucha ku hende di koló, hende muhé (t)a hiba. Un lucha pa igualdat, un lucha pa dignidat i un lucha pa keda rekonosé komo un miembro balorá di e komunidat aki. E ta un lucha pa derechi humano. No ta esaki nos mester ke pa tur miembro di nos komunidat? Nos no por ta lucha kontra un sistema di desigualdat di un banda, mientras nos mes ta mantené na bida un sistema diskrimiminatorio kontra LGBTQ+. Loke a pasa ta inakseptabel. 

E lenguahe repudiabel aki no ta nobo ni un sorpresa. Tur siman di nobo tin kas religioso na Kòrsou ta plama odio kontra di LGBTQ+ sitando bukinan religioso, e mes bukinan ku pa hopi aña a usa pa hustifiká sklabitut i diskriminashon kontra hende muhé. No ta solamente serka e misanan -ku lo mester tabata fungi komo un kompàs moral- pero tambe den nos komportashon diario nos ta falta  rèspèt pa otro. Nos mester ta honesto, konsiente i kambia nos komportashon.

Loke a pasa ta partikularmente doloroso ora realisá ku hende ku ambishon di ‘role model’ pa e generashon di relevo, ta usa e mesun táktikanan di semper pa diskriminá.

Bo no mester ta miembro di LGBTQ+  pa realisá ku diskriminashon i odio ta robes. No solamente ora e ta afektá “bo” grupo, pasombra un atake kontra di un (1) grupo ta un atake kontra tur grupo di e komunidat aki.

Willemstad, Kòrsou

Advertisement