Korte a salba demokrasia i outonomia

Korte ta salbando nos demokrasia”, esei mi a skibi na aprel 2017*. E ta relevante awe mas ku nunka despues ku Hues a instruí un Parlamentario pa bai reunion i aprobá e kredensialnan di Parlamentario Elhage. Pa hopi siman algun Palamentario a kousa un impase Konsitushonal dor di no forma korum pa ningun reunion di Staten. Tempu balioso ku no a usa pa atendé ku nos pais ku ta sufri riba múltiple frontera.

Nos a siña nos lès? E biaha aki si algu similar nunka mas lo pasa? Improbabel. Meskos nos a kere na 1977 ora algun parlamentario a stroba no 1, sino 13 miembro di parlamento huramentá.

Hustamente den e tempu di outoritarismo, polarisashon i menasa di gruponan minoritario den nos komunidat, Korte su ròl den nos estado di derechi ta krusial. Ta p’esei mi a propené for di 2015 un sistema di revishon konstitushonal ku ta enserá ku tur lei i desishon por keda revisá pa un Korte Konstitushonal** pa wak si nan ta konforme  nos lei mayó, nos Konstitushon. Ta tempu pa diskutí mi konsepto di lei.

Tambe e kaso ya menshoná mester pone na diskushon si ta kumbiní nos pais keda ku nos sistema di demokrasia parlamentario den kua e miembro di Parlamento ta ‘onschendbaar’. Algun Parlamentario opviamente ta konsiderá ku ta pasombra nan a bai elekshon nan tin poder selestial pa hasi i deshasí. Ami ta kere den un sistema unda e Konstitushon ta ‘onschendbaar’. Esaki nos ta yama un demokrasia konstitushonal. Den futuro lo mi elaborá.

Danki na Korte ku a resolvé e krísis di estado di derechi i a evitá medida di supervishon di Den Haag. Korte a salbaguardiá nos outonomia. No dor di grita disparate manera West Indische Compagnie, pero dor di hasi su trabou manera debe ser. Mas ku nunka e otro podernan demokrátiko tambe mester karga nan responsabilidat. Mas ku nunka pueblo mester komprondé e konsekuensianan di vota pa un grupo di inepto.

Willemstad, Kòrsou

*https://alexdavidrosaria.blog/2017/04/19/korte-ta-salbando-nos-demokrasia/

**https://alexdavidrosaria.blog/2020/08/08/constitutionele-toetsing/