Oumento pa ministernan ta robes

Kualkier hende ku ta konta chiste sa ku e aspekto mas importante ta “timing” di e “punch line”. Di otro banda timing tambe ta importante ora bo tuma un desishon fèrfelu, manera oumento di salario di ministernan den un periodo di krísis, covid 19 ku ya a obligá e gran mayoria di pueblo i negoshante entregá.

Mi ta komprondé ku hurídikamente ta trata aki di un desishon “ambtelijk” pa hisa salario di e ministernan. Hurídikamente Konseho di Minister (KdM) no ni a oponé ni akòrdá e desishon, pero a bisa “kennisgenomen”. Den práktika sinembargo KdM a bai di akuerdo ku e desishon. Pregunta ta pakiko KdM no a “overrule” òf posponé e desishon ambtelijk? 

Tambe mi ta kompronde ku hurídikamente e oumento ta korekshon di un fayo for di 10-10-10. A korehí e fayo riba 19 di ougùstùs 2020, pero kiko ta pasa ku e periodo di 10-10-10 te ku 19 ougùstùs 2020? E ministernan aktual ta haña ku forsa retroaktivo for di momentu ku nan a sinta? E ministernan anterior (ku hurídikamente) a traha bou di un fayo ku no tabata nan falta, tambe lo keda rekompensá? E desishon aki lo tin konsekuensoa pa nan penshon? Kon ta para ku e ministernan ku durante di e periodo di fayo aki a kobra overbrugging?

Ta parsemi ku hurídikamente e korekshon di e fayo no por ta konta pa esnan aktual so, pero pa tur minister ku a traha for di 10-10-10. Kuantu plaka esaki lo kosta? A tene kuenta ku esaki den presupuesto(nan di mas aña)?

Finalmente pakiko no por a wanta e oumento salarial di e Sekretarionan General? E prinsipio di skoudernan hanchu no ta konta?

E timing di gobièrnu ta teribel i ta kousa rabia. Tambe e ta kousa konfushon si kos enbèrdat ta asina malu. Mi a bisa anteriormente ku outonomia kier men manehá nos asuntunan na drechi. Awor, ta ken tin rudia riba nos outonomia?

Willemstad, Kòrsou