Durante un foro organisá pa Partido Nashonal e siman aki un panelista a trese dilanti ku mr. dr. Moises Frumencio da Costa Gomez (Dòktor) tabata den Katholieke Volkspartij (KVP). Esaki no ta bèrdat. Prinsipalmente pasombra e panelista a bisa di ta un fiel siguidó di Dòktor, ta importante koregí e fayo aki.
Na 1936 Dòktor i Monseigneur Verriet a lanta Curaçaosche Rooms Katholieke Partij (CRKP). CRKP tabata e partido di mas grandi di Kórsou pa loke ta trata elekshonnan 1937, 1941, pero ta pèrdè ku Partido Demokrat na 1945. Dòktor, parlamentario pa CRKP, tabata sinti su mes frustrá ku CRKP tabata move muchu poko poko ku outonomia i derechi di voto universal. Awa a pasa hariña ora Pader Mölmann a bisa: “de grote massa mag absoluut niet stemmen*”. Kiebro di Dòktor i CRKP a bira eminente na 1947. Na 1948 CRKP, konsiderando ku Dòktor su akshon tabata un traishon, a disolvé i stòp di èksistí. Na komienso di 1948 elementonan di CRKP a yuda lanta dos partido nobo: Katholieke Volkspartij (KVP) i Nationale Volkspartij (PNP). Katholieke Volkspartij na 1960 ta hañ’é obligá ta kambia su nòmber pa Konstruktieve Volkspartij pasombra Obispado aki a prohibí e partido usa e palabra “katóliko”. Obispado tabata hostiná ku KVP anteriormente a forma un Bestuurscollege ku Partido Demokrat (DP). Obispado tabata konsiderá DP ku tabata influensiá pa Protestantnan, enemigu mortal di katolisismo. Despues di 1962 KVP ta desaparesé.
Dòktor pues nunka a forma parti di KVP, sino di CRKP ku ta dos partido diferente.
Willemstad, Kòrsou
*Curaçao, 2 augustus 1945
Alex David Rosaria Blog 