Kontrali na lokual nos ta tende kada biaha, petishon pa outonomia na Reina di Hulandes no a originá na 1946, 6 yüni ora Staten di Curaçao a bai di akuerdo ku e inisiativa di Parlamentario da Costa Gomez pa pidi outonomia. E luna aki ta konmemorá e hecho ku 97 aña pasá, esta 23 aña promé, di e promé petishon ofishal i por eksrito a keda entregá.
E promé aktornan ku a hasi un petishon pa outonomia tabata Vereeniging Curaçaosche Vrijheidsbond òf “de bond” ku a keda fundá na 1922. De bond tabata konsistí di mayoritariamente intelektualnan di ideologia liberal i Ku tabata kontra di dògmanan religioso. No por tabata un sorpresa ku e Mishon Katóliko tabata kontra di e grupo aki.
Apesar ku de bond no tabata un partido polítiko, su metanan tabatin tur tinta di polítika, esta “streven naar autonomie voor Curaçao met handhaving van de saamhoorigheid met het moederland”. Tambe de bond tabata na fabor pa un parti di e poblashon por a skohe su representantenan via elekshon basta ku e persona tabatin 25 aña, un salario anual di por lo menos f 1,200 òf a importá merkansia na un balor di f 10,000 pa aña òf a haña entrada di por lo menos f 500 di merkansia físikamente na Kòrsou i ku a pasa sierto èksamen ku despues mester keda determiná. De bond tabata usa su publikashon bi-mensual, Voz del Pueblo: Algemeen Weekblad, orgaan van de Curaçaosche Vrijheidsbond pa plama su ideanan.
E petishon, mas bien un programa di akshon tabatin komo promé (di 12) punto un petishon pa outonomia: “Autonomie voor de kolonie, in den geest van het Nederlandsche Staatsrecht ten opzichte van provinciën en gemeenten, waarbij het voldoend ontwikkelde gedeelte der bevolking en zij, die in de belastingen bijdragen in die mate als nader bij de wet te bepalen, het recht van medezeggenschap hebben, met handhaving van de saamhoorigheid met het Rijk in Europa”. Mas a leu e petishon/plan di akshon ta papia di “bevordering van kunsten en wetenschappen”, “bevordering van spaarzin”, “bestrijden misbruik van sterken drank”, “voorkomen van buitensporige schoolbouw’ i “geen beperking van de vrijheid van het winkelbedrijf en vermijding van concurrentie van overheidswege”.
Den un reunion di 19 september 1923 ku a tuma lugá den e edifisio di Loge De Vergenoeging, miembronan di de bond a aprobá e petishon ku despues a keda mandá pa Reina di Hulanda. Presidente di de bond tabata entre otro sr. C.H. Jonckheer, Sekretario, sr. H.J.C.B. Hellmund.
Willemstad, Kòrsou
Alex David Rosaria Blog 