E bon notisia ta ku nos ta probablemente algun luna alehá for di un vaksinashon kontra di covid 19 responsabel pa un desaster riba tereno di salubridat i sosio-ekonómiko. E mal notisia ta ku tin un “movementu anti-vax” ku fervientemente ta plama e teoria ku hende mester keda leu for di imunisashon kontra corona 19 pa konsiderashonnan religioso i sigun teorianan di konspirashon. Mas éksitoso e grupo aki ta pa kombensé hende pa no tuma un vakuna kontra di covid 19, mas difísil ta bira pa kombatí e malesa. No kere ku no tin anti-vax na Kòrsou. Nos mester ta alèrt.
E movementu anti-vax no ta kere ku vaknisashon ta yuda kontra malesa, pero ku e ta krea malesa serka esnan ku keda imunisá. E kreyentenan ta basa nan mes riba sea konsiderashonnan religioso òf diferente tipo di teoria di konspirashon. Nos mester a tende di algun di e teorianan ku ta flota eifó: covid 19 ta kreashon di un grupo selekto di bionario òf ku e ta resultado di teknologia 5G.
Ounke ningun di e religionnan grandi ta kontra vaksinashon, tin vários sekta Kristian ku si ta anti-vax. I den e kaso spesífiko di Oxford (Inglatera) – esun ku ta mas leu sientífikamente pa inventá e vaksinashon kontra covid 19- esaki ta haña mas resistensia di Katólikonan di vários pais. E rason ta ku e sientífikonan na Oxford den e proseso pa haña un vaksinashon ta usando kopia di sèlnan humano ku a originá di un feto abortá na 1973. Obispunan na e.o. Inglatera, Merka i Oustralia ta lòbi pa para e proseso di Oxford i buska un alternativa ku no tin ke ber ku e feto di kasi 50 aña pasá. Interesante ta ku un kantidat di vaksinashon èksistente (“rode hond”, hepatitis A i sende-paga) ta usa e método di Oxford basá riba sèl di feto.
Na komienso di 2019 e Organisashon Mundial di Salú di Nashonnan Uní (WHO) a designá e movementu anti-vax den e top-5 menasanan mas grandi pa salubridat mundial. Sifranan ta mustra ku anti-vax tabatin hopi éksito kontra vaksinashon kontra sarampi: infekshon di sarampi mundialmente a subi ku 30%.
Ta opvio ku un vaksinashon kontra di covid 19 no ta final di e tùnel. Tin un trabou importante pa Fòrti i Ekipo Gerstenbluth hasi pa kombensé tur hende riba e nesesidat di vaksinashon una bes esaki ta aprobá i disponibel. Sino, e konsekuensianan por ta leu di loke nos a spera.
Willemstad, Kòrsou
Alex David Rosaria Blog 