Lòs for di un kantidat di pregunta relevante tokante di benta di UTS, manera kalidat di servisio despues di benta, unda e plaka a bai presis, mi tin un remarke ku te ainda – na mi konosementu- no a keda hasí. Kon por ta posibel ku e mesun hende ku Fòrti a nombra na kabes di e komishon di privatisashon di UTS tabata tambe presidente di Fair Trade Authority Curaçao (FTAC)?
Dikon e pregunta aki? FTAC ta responsabel pa vigilá pa no tin formamentu di monopolio i kompetensia inhustu den nos pais. Den nos kaso, e mesun Presidente di FTAC a sinta na mesa di un negosashon di benta di UTS ku ta tin tur ingrediente di bai afektá kompetensia den nos telekomunikashon.
Pues for di un komienso tabata vislumbrá ku benta di UTS na Liberty Latin America por kondusí na monopolio indeseabel den nos pais. Pa e sólo echo aki tabata robes di a apuntá e Presidente di FTAC komo Presidente di komishon di privatisashon di UTS. Mester a evitá asta e ‘schijn’ di konflikto di interes i inkompatibilidat di e dos funshonnan aki.
Pakolmo a resultá ku e benta a resultá den práktikanan monopolístiko ku resultado ku kalidat di servisio a bai kompletamente atras.
Konsistentemente mi a protestá kontra di monopolio i areglonan ku ta stroba kompetensia sano. P’esei mi a kita protekshon di merkado i tabata kontentu ku mi a defendé i aprobá den Staten e lei ku a krea FTAC den e periodo 2012-2016.
Bèk na e konflikto di interes ku benta di UTS i FTAC. Nos mester realisá ku ta e tipo di prosedernan ariba menshoná ta mina nos demokrasia, institutonan demokrátiko i outonomia. di nos pais.
Mi ta spera ku Kontrolaria General i Staten i gruponan na fabor di transparensia rápidamente lo wak e asuntu aki promé ku ta CHE òf Den Haag mester hasié òf hala nos atenshon atrobe.
Willemstad, Kòrsou
Alex David Rosaria Blog 