Eksaktamente un aña pasá ministerio di Maneho di Gobernashon, Planifikashon i Servisio Públiko (BPD) a keda di “hack’. Esaki ta e ministerio ku ta responsabel pa entre otro Ofisina Sentral di Statistik di Estadístika (CBS), Archivo Nashonal, Rekurso Humano i Kranshi.
Hacking ta un atake via internèt riba data i informashon digital. Hackmentu por enserá entre otro eliminá, manipulá, añadí dato i konsekuentemente komprometé integridat di dato i informashon relevante.
Djis nos ta bai urnai te ainda Fòrti no a deklará kiko a pasa aña pasá, si a logra identifiká e kulpabel(nan), kua dato a keda komprometé, si a a tuma prekoushon pa no tin ripitishon i prinsipalmente kon konfiabel nos sistema di dato ta prinsipalmente den bista di elekshon binidero.
Banda di esaki tin un otro peliger. Nos atministrashon di adrès di hende ta desastroso. Ya mi a mustra ku tur hende por bai Kranshi i inskribí na kualkier adrès. Abo ku ta biba na Kaya XYZ # 14 ta yega Kranshi i bisa ku bo ke kambia adrès i bo ta inskribí na mi adrès, Kaya NYY # 27. Esaki, sin ku mi ta na altura òf a duna pèrmit pa hasié. Kranshi ta hisa buta i no ta hasi ningun pregunta i no ta pidi pa prueba di mudansa (e.o. kontrato di hür, akta di kompra).
No ta un sorpresa ku un kantidat grandi di biyete di voto ta keda entregá na adrèsnan ku no ta kuadra loke lógikamente ta pone ku un kantidat di hende ta keda sin bai urna. Pa kambia esaki aparentemente no mester di lei nobo. Simplemente mester trese kambio atministrativo pa evitá e “wild west” ku adrès.
Ta di spera ku nos ta tuma e asuntunan aki na serio. Nos demokrasia no por funshoná manera debe ser si nos no atendé ku nan.
Willemstad, Curaçao
https://alexdavidrosaria.blog/2018/12/06/bo-sa-ken-ta-registra-na-bo-adres/
https://alexdavidrosaria.blog/2020/01/06/curacao-govt-databases-hacked-a-reality-check/
Alex David Rosaria Blog 