Lès di e Lei di Eksepshon

E lei di eksepshon a lanta hopi stòf den nos komunidat.

Pa ami, den e mundu kompleho ku nos ta biba aden, nos mester tin leinan pa situashon èkstraordinario i eksepshonal. Esaki no tin ke aber ku Kòrsou ta chikí òf no; nos tambe ta parti di e mundu aki. Un realidat ta ku hopi kos ku ta òf por bira nesesario den un kaso èkstraordinario no ta ankrá den leinan konvenshonal di nos pais. 

Ta sumamente importante sinembrago ku den un lei di eksepshon, tin múltiple ‘checks’ di parti di nos institutonan demokrátiko, prinsipalmente Parlamento i Korte i tambe un bon ‘balance’ entre di nos derechinan konstitushonal i e poder eksepshonal ku Gobièrnu ta haña den kasonan eksepshonal.

Hopi pais demokrátiko na mundu tin un òf otro forma di e lei di eksepshon ku ta i a funshoná manera mester ta. Dikon aki na Kòrsou e lei aki a konta ku tantu resistensia? 

Demokrasia meskos ku un sistema monetario, den sièrto sentido, ta basá riba konfiansa. Aki no tin konfiansa. Nos pais, siendo un demokrasia parlamentario mester na di promé lugá tin un Parlamento fuerte ku ta manifestá su mes ku Parlamentarionan kapas i íntegro. Anto esei nos no tin. Nos ta mira ku kada biaha di nobo pueblo ta vota pa partidonan ku ta pone Miembronan di Parlamento ku no tin sikiera e ‘denkvermogen’ i integridat nesesario pa hasi e trabou di tantu responsabilidat aki. Komo konsekuensia hopi hende no ke konfia Parlamentarionan ku e lei poderoso di eksepshon. 

Mi no por tuma nan na malu. Nan tambe ta kòrda kon resientemente tabatin dos Parlamento den nos pais, kon un minister Presidènt ku a keda bahá no kier a sali foi Fòrti, kon miembronan di Staten a sera kabes pa no laga un kolega huramentá, kon un minister ku a bisa ku lo no bin elekshon mientras lei tabata bisa otro i un otro ku a deklará ku siendo minister su negoshinan mester por benefisiá di su posishon den Fòrti. 

Nos a yega asina leu ku no ta konfia nos mes hendenan pa atendé ku nos tareanan outónomo. Esaki ta e konsekuensia di nos voto. Mientras partidonan polítiko keda pone hende inepto riba nan listanan i nos keda vota pa nan, nos lo hasi e krísis di konfiansa ahinda mas grandi. I esaki ta e motibu prinsipal ku e opshon di munisipio di Hulanda kada biaha ta bira mas atraktivo pa hopi hende.

Den un otro artíkulo lo mi amplia riba kon por hasi e ‘checks and balances’ den e lei aki mas skèrpi. Algu ku ta nesesario den e entorno di deskonfiansa grandi ku ta èksisiti.

Promé ku tur kos mester laga e stòf i emoshonnan baha ounke kuantu polítikonan ke kompará nos ku Gestapo òf Idi Amin Dada. E lès ku mester saka for di e episodio aki ta ku ta e manera di hiba polítika ta pone ku no tin konfiansa at all den nan i nos institutonan demokrátiko. Esaki, den un situashon di krisis i un mundu turbulento kaminda konfiansa entre pueblo i su gobernashon mester ta saludabel.

Willemstad, Curaçao