Enfrentá futuro òf skonde p’e den pasádo?

Ta remarkabel ku ora kos no kana bon, un grupo semper tin komo solushon pa bai bèk den pasado. Sistema di enseñansa ta defisiente? Ban bèk LTS òf asta “tempu di frater”. Tin ke pa bo bolbe vota pa nan, no pa nan ideanan pa futuro, pero simplemente pasombra abo òf bo mayornan a hasi’é den pasado. Tin no sa otro ku hunga víktima di kolionalismo i sklabitut enbes di atendé ku nos heridanan i para pa responsabilidat propio. Otronan ta preferá no diskutí e karákter rasista di zwarte piet i bai bèk e tempu ku nos komo adulto tabata “gosa” sin problema di e pietnan pintá pretu. “Hasi Merka Tremendo Atrobe” a bira popular pasombra aparentemente 20, 40, 60 (?) aña pasá “kos” (sin spesifikà kiko) tabata mihó.

E realidat ta ku nos no tin un vishon orientá riba futuro. Nos ta preferá bai den pasado, anhelá pa e tempu aki bin atrobe, no pasombra e tabata asina bon, pero pasombra  kòrda “goede oude tijden” ta mas fásil ku atendé ku e retonan di futuro. Ki tipo di pais nos ke ta den futuro? Kon nos ta posishoná den nos region i mundu? Ki tipo di hende nos mester pa nos realisá e vishon pa futuro. 

Mayoria di e problemanan grandi di futuro ta global ku por keda solushoná solamente ku koperashon global. Sinembargo nos no a demostrá apetit pa retnan importante regional i multilateral. Tampoko nos a kontinuá ku e proposishon (2016) pa lanta un Planbureau pa independientemente konsehá riba temanan manera: inteligensia artifisial, manipulashon genétiko, robòt i merkado laboral, eutanasia, skarsedat di awa dushi, diversidat, i kambio di klima. Ki dia Fòrti òf Staten a atendé e temanan aki?

Komo turista ora bo pèrdè kaminda un bon strategia ta pa bai bèk hotel i start di nobo. Esaki sinembargo no ta funshoná ora tin ku guia pais. Urgentemente nos mester di hende ku ta skohe pa enfrentá futuro i no skonde p’e den pasado.

Willemstad, Kòrsou