Partido òrtodòks bíbliko di Kòrsou, CPP (1945)

Nos a konosé un gran kantidat di partido den nos demokrasia parlamentario. Curaçaose Protestantse Partij (CPP) tabata un partido partikular pa su fundeshi moral bíbliko i e echo ku e no tabatin Yu di Kòrsou riba su lista.

Lantamentu di Partido Demokrat (DP) na 1944 a sakudí polítika lokal. Moises da Costa Gomez (Dòktor) di Curaçaosche Roomsch Katholieke Partij (CRKP) -ganadó di e promé dos elekshonnan den nos historia- a sinti e kompetensia fuerte. DP tabata un partido independiente di iglesia i konektá ku pueblo, mientras CRKP tabata dominá pa loke padernan dikta.

CPP a lanta riba 25 yüli 1945, probechando di un divishon Katóliko kontra no-Katóliko i akusando DP di anti-kristian influensiá pa masoneria, diabel i komunismo.

CPP no a pone hende ku a nase na Kòrsou riba su lista lokual a pone ku e korant pro-katóliko, Amigoe di Curaçao a yama CPP: “anti-Kòrsou”. E top-3 di CPP tabata: Hendrik Tiesma, Direktor di Prizòn, Floris Visser, Presidente di Curom i Wybojan Goslinga, Direktor di Enseñansa. Tur tres (salí di kas) protestant òrtodòks.

Pa CPP moralidat bíbliko tabata sentral loke tabata reflehá den su plan di kampaña. Prioridat di CPP tabata pa defendé interesnan protestant-kristian i plama e dògma rònt Kòrsou. E tabata ke pa eliminá tur barera ku tabata stroba Hulandesnan muda bin Kòrsou. Lei i maneho mester tin un fundeshi bíbliko i konsekuentemente tabata kontra di weg’i plaka i konsumo di alkohòl. Pa CPP konosementu di Hulandes lo a hasi nos un pueblo sivilisá.

DP probechando di un divishon den CRKP (konservativonan vèrsus progresivonan manera Dòktor) i un CPP deskonektá foi pueblo, a gana elekshon (2,122 voto), propinando Dòktor su promé derota elektoral (1,208 voto). CPP a haña apenas 190 voto i a desaparesé di polítika.

Remarkabel ta ku e moralista bibliko, Goslinga, despues komo Parlamentario pa Partido Nashonal ta defendé Kampo Alegre den un reunion di Staten riba 31 mei 1951. Amigoe di 2 yüni 1951 briyantemente ta pone riba su portada: DR. GOSLINGA VERDEDIGT KAMPO ALEGRE MET DE BIJBEL.

Willemstad, Kòrsou