Añanan anterior mi a sinta ku un hende interesá pa subi lista promé biaha. E a start bisa ku e ta bon pa 500 voto. Mi promé pregunta tabata:”Ki tipo di antepasado bo ke ta pa generashonnan ku lo tei dia abo tin tempu kaba ku bo a pasa pa un mihó bida”?
Awe fásilmente ta maldishoná nos antepasadonan pa nan desishonnan robes i inhumano manera sklabitut, kolonialismo, genosidionan religioso, rasismo institushonalisá, diskriminashon kontra hende muhé i un grupo grandi di minoria. Nos ku awe ta indigná riba e antepasadonan, no ta tei pa laga nos bos resoná. Tampoko nos por hiba nan dilanti, pasombra nan no ta na bida mas.
Echo ta ku meskos ku e antepasadonan ariba menshoná, nos tambe tin awe den nos man desishonnan ku lo influensiá bida di miles di mión di hende ku ainda mester nase i ku awe no tin bos, derechi ni representashon.
Ki tipo di legado nos ke laga? Ki desishon nos ta tuma awe pa ku kambio di klima, dependensia riba kombustibel fósil, diskriminashon di LGBTQ, un poblashon kada biaha mas chikí i mas bieu, “inteelt”, inklushon, desigualdat, djis pa menshoná algun?
Jonas Salk, inventor di e vakuna kontra polio (1953), kousante di miónes di morto i parálisis, a bisa ku e no a pidi patènt pa su vakuna loke lo a hasié riku. E a preferá duna su invento na futuro generashonnan. Awe, polio ta praktikamente eradiká.
Jonas Salk a preferá bienestar pa tur, inkluso esnan ku ainda mester bin, riba ganashi riba korto plaso. Ta fásil primintí shelu i tera na esnan ku tei pasombra nan por vota pa bo. Bo legado sinembargo ta dependé kiko bo a hasi p’esnan ku no a nase ainda, ku ainda no tin ni bos ni derechi di voto. Nos mester di kandidatonan ku un panorama fihá riba futuro, ku ta komprondé ku nos no por sigi komprometé futuro di esnan ku despues lo habitá nos isla i nos mundu.
Willemstad, Kòrsou
Alex David Rosaria Blog 