A ‘hack’ un Ministerio: silensio i no a tuma medida

Dos siman despues di huramentá komo Parlamentario riba 2 novèmber 2012, mi a hasi e mandatario di Tráfiko i Komunikashon e siguiente pregunta den un reunion di Staten: “Kiko ta bai hasi pa regulá bulamentu di ‘drones'”. Promé ku e mandatario kontestá, mi a top’é pafó durante un pousa. Ku un sonrisa e a bisami:”Alex, bo ke stòp di hòis? Drones? Ku aroplano mes, Dios sa. E kosnan ei ta pa paisnan grandi”.

Esaki ta djis un ilustrashon di hopi kos ku nos ta laga pasa den nos pais, posponé pa eternidat te na momentu ku e kos èksplotá den nos kara. Esaki tambe ta e kaso ku e peliger di ‘hacking’ ku vários pais a dekretá komo un peliger pa seguridat nashonal.

Manera nos sa, aña pasá ministerio di Maneho di Gobernashon, Planifikashon i Servisio Públiko (BPD) a keda di ‘hack’. BPD ta responsabel pa elekshon, datonan di nos poblashon, estadístika, datonan di tur ámtenar i archivonan nashonal. Nunka a bin un splikashon di Fòrti kiko a pasa.

Kisas mas prekupante ta ku apesar di esfuersonan interno di e aparato mes, mi tin informashon ku ni sikiera a instalá un sistema básiko di protekshon digital. Durante un siguiente ‘hack’ por resultá ku nos datonan ta riba kaya, kai den mannan indeseabel òf keda komprometé. Esaki lo por tin konsekuensia grave pa nos demokrasia i votamentu na mart. Ta esaki mester pasa pa nos tuma akshon?

Willemstad, Kòrsou