Durante reunionnan di Konseho Insular (KI) durante 1962/1963 pa yega na un kambio di Kiesreglement, miembronan di e kolegio a akusá, menshonando nòmbernan spesífiko, rumannan oochi di a kometé froude elektoral serio. A akusá e oochi di laga otro hende usa nan karchi di vota. E diskushonnan di KI (konsistiendo di 10 miembro di Nashonal, 9 di Demokrat i 2 di Katólikonan) tabata trata di kambionan den Kiesreglement ku mester a redusí e chèns pa froude. E akusashonnan a keda inkorporá den e relato temporal, alabes final di KI.
Tabata trata di oochi R. di e bario humilde di Libië, parti di Santa Rosa. E mama di e oochi Sra. R. geboren R di 67 aña di edat ku a fada di tende e akusashonan, a disidí di manda un karta, por sierto hopi emoshonal, pa KI.
Den su karta e a bisa: “Ik ben een eenvoudige vrouw die een ander moet vragen deze brief voor mij te moeten schrijven, maar ik zou graag hebben dat U mij goed begreep”.
E mama a splika ku su yunan a fayesé 27 aña promé (pues na 1936) tempu ku nan tabata beibi. E mama mas aleu ta puntra dikon despues di tantu aña miembronan di KI ta habri e heridanan di pèrdidá di su yunan i hasi polítika ku su doló. “Is het niet voldoende geweest dat ik mijn kinderen verloren heb? Moet nu 27 jaar na hun dood, politiek met hun namen bedreven worden? Moet hun moeder met zoveel woorden beticht worden dat zij oneerlijk en eigenlijk een strafbaar feit heeft begaan? “
Sra. R geboren R a bisa tambe ku si e oochinan tabata na bida, nan lo por a vota na elekshon di 1959 i 1962. Mas aleu e ta splika ku e tin e 4 karchinan pa bai vota di su yunan bon wardá i a añadí fotokopia huntu ku su karta. Pues no por ta posibel ku a kometé froude pa vota, sino e no por tin e karchinan di voto.
Tambe e señora ta splika ku no por tira falta riba dje ku Kranshi no a hasi su trabou i manda e karchinan p’e. Bèrdat mester bisa ku den e relatonan ariba menshoná no a ni diskutí e posibilidat di fayo di parti di Bestuurscollege.
Na final di su karta e ta pidi pa kita e mentiranan for di e relato di KI. E señora ku a firma e karta ku un krus pasombra e no por a skibi ni lesa a bisa: “Wij zijn heel gewone mensen, maar we zijn eerlijk”.Te leu ku mi por a averiguá, KI no a kontestá Sra. R geboren R, no a ofresé diskulpa ni a adapatá e relato.
Willemstad, Kòrsou
Fuentenan: Amigoe di Kòrsou 26 ougùstùs 1971, Archivo Nashonal.
Alex David Rosaria Blog 