Nos bisiña Barbados ta dal un paso mas di emansipashon

E aña aki nos bisiña Barbados ta dal un paso importante den su proseso di emansipashon polítiko. Despues di 54 aña di independensia Barbados ta bira un repúblika en bes di e situashon aktual, esta ku ta e Reina Britániko ta su Hefe di Estado. Pues, Barbados lo haña un Presidente. Esaki lo tuma lugá na novèmber 2021, fecha riba kual e isla lo kumpli 55 aña di independensia.

Hopi pais den Karibe ku a logra nan independensia di Gran Britania den pasado a keda mantené Reina komo Hefe di Estado. Asina aki Barbados lo djòin mas isla Karibense ku ya a kibra ku e monarkia Britániko: Trinidad & Tobago, Guyana i Dominica.

E rason prinsipal ku Barbados a tuma e paso aki ta ku nan ta haña ku komo pais nan a demostrá di a manehá nan independensia na un manera satisfaktorio i ku nan mes mester asumí e responsabilidat di hefe di estado. Hinter pueblo ta tras di e desishon aki.

Remarkabel ta ku Barbados tabata riba e lista di Nashonnan Uní di paisnan no-independiente (List of former Trust and Non-Self-Governing Territories) te 1966. Nos, foi 1955 kaba no tabata riba e lista aki pasombra nos tabata “asina leu kaba riba kaminda di outonomia” i por a kombensé hefatura di Nashonnan Uní di esaki.

Sinembargo nos no a sa di manehá nos outonomia na drechi i p’esei nos no a sa di kombensé pueblo i krea konfiansa ku nos mes por asumí (mas) responsabilidat. Kòrsou un tempu tabata kana dilanti, e tabata pionero den e proseso di emansipashon polítiko den nos region danki na e.o. mr. dr. Moises da Costa Gomez. Awe e proseso aki ta “den reverse”. Den un diskursou riba 17 di ougùstùs 2007 na Ref, mi a atvertí ku outonomia, manera un flor bunita, mester keda kuidá diariamente, sino e ta muri.

Mi ta deseá tur hende un Bon Aña, spesialmente mi lesadónan den mas ku 160 pais.

Willemstad, Kòrsou