Poko despues ku na 1499 Spañónan a pèrdè strea di nòrt i yega nos isla, Spaña a deklará nos “isla inutil” na 1513. Esaki apesar ku míles di indjan tabata kome i biba aki for di tempunan prehistóriko.
For di 1816 Aruba, Boneiru, Sint Maarten, Sint Eustaius i Saba por a vota (basá riba kondishonnan di entrada i kapasidat intelektual) pa propio representashon den un Raad van Policie pa atendé asuntunan lokal. Na Kòrsou esei no tabata por. Representashon pa tur 6 isla apuntá pa Hulanda tabata sinta den Punda. Segun Hulanda un representashon sentral i lokal riba e mesun isla ta muchu kompliká pa Kòrsou.
Na 1866 Sürnam ta haña derechi pa skohe mayoría di su representantenan Parlamentario. Nos no a haña esaki asombra pa Hulanda nos no tabata madurá sufisiente kompará ku Sürnam.
Riba 22 novèmber 1894 e promé yu di tera di koló den Koloniale Raad, Géneréux de Lima a protestá i bisa ku mester stòp di diskriminá Kòrsou. Novèmber 1894, outoridat haltu di Hulanda na Kòrsou, J.J. Hamelberg, ta bisa ku si duna Kòrsou derechi igual di voto lo bin “kanibalismo, adorashon di diosnan falsu i relashon seksual entre hende i bestia”.
Na momentu di lucha pa derechi di voto universal, religiosonan di afó manera Mohlmann i Radulphus ta bisa: “ku derechi voto pa tur hòmber (esta e poblashon pretu) mes, dios sa, pero sigur no por konfia muhé ku voto“.
I ora nos kere ku tipo di asalto aki riba nos psychy kolektivo ta kos di pasado, nos ta kibuká nos mes. Ora papia di derechi igual pa tur hende tin ta bisti maskarada di Hamelberg, inkluso algun religioso, pa bisa ku matrimonio entre e mesun sekso ta kondusí na poligamia, pedofelia i satanismo.
Na moda ta pa kambia “inutil” pa “nos no por“. Ta bati nos alma i kibra nos fe ku tur tipo di propaganda ku nan plaka por kumpra pa nos bira parti desigual di Hulanda. Nan ke bo voto no pasombra nan mes por solushoná nos problemanan. Nan ta simplemente un “salesman”, un “tussenpersoon” pa entregá nos den man di Hulanda.
Tambe mester apuntá ku un grupo muchu grandi di hende ku (ta)tin e oportunidat pa traha riba desaroyo mental i bienestar di nos pueblo, a faya ku nos outonomia.
Mas ku nunka nos mester di hòmber i muhé ku ta kere den empoderashon, dignidat propio, honestidat i trabou duru.
Willemstad, Kòrsou
Alex David Rosaria Blog 