Mes kos ku miyones di hóben na Merka, mi ihá i su ruman, ámbos, Merikano bou di 24 aña na 2016, a vota pa Sr. Sanders bira e kandidato pa Kas Blanku. Sanders no ta hóben pero e (taba)tin un apelashon inkreibel serka hóbennan. Pakiko? E ta papia i ta interesá den temanan ku ta apelá na hóben: kambio di klima, turismo responsabel, reforma di sistema bankario i fiskal, mas partisipashon den prosesonan demokrátiko, derechi di animal, multikulturalismo, integridat djis pa menshoná algun.
Aki, mas opvio awor ku ta temporada di elekshon, ta apelá na hóbennan dor di desbaratá tur hende ku no ta hóben. Aparentemente si bo no ta ‘hóben’ manera nan ta definí esaki, bo no ta sirbi. Pues listanan ta inundá ku hóben ku segun nan ta adekuá a base di solamente riba e fecha ku nan a nase. Bo no ta tende di kontenido ku ta apelá na hóben manera prinsipalmente kambio di klima, kuido di animal, manipulashon genétiko, eutanasia, peliger di e-sigaria, poblashon ku ta dekresiendo, remplaso di e industria petrolero i muchu mas.
Hinter e asuntu di hóben aki a bira manera e kantika Quitate Tu Pa’Ponerme Yo. Un pregunta ta surgi: e hóbennan aki ku awe ke kore ku tur no-hóben ta primintí ku mayan ora nan no ta hóben mas (konforme e mesun definishon ku nan ta usa awe) lo hala kita pa esnan hóben e tempu ei? Si t’asina, mi no a tende nan afirmá esei.
Un koseho. Bo no mester ta un hende muhé pa bo lucha pa derechi di muhé (pensa riba Dòktor da Costa Gomez), bo no mester ta pretu pa lucha pa derechi di hende pretu na Merka (John F. Kennedy, Pearl Buck). Pues e lucha di issues importante pa e hóben i esnan ku ainda tin ku nase no ta dependé di e edat di luchadó, sino su konvikshon, kapasidat i abilidat di mira dilanti i tuma akshon.
Willemstad, Kòrsou
Alex David Rosaria Blog 