Internashonalisando

Ayera 24 di yanüari 2021 Z-86 a lansa e promé edishon di Mesa Rondó tokante Geopolítika. Na mi pareser esaki ta promé biaha ku algu similar a keda tresé dilanti. Mi ta di opinion ku e programa aki ta yena un nesesidat ku ta èksistí plùs ta krea interes pa susesonan internashonal, pero prinsipalmente kon esakinan ta influensiá (repartishon di) poder den mundu. Mi speransa ta ku aki na Kòrsou nos ta bai bira ménos tímido pa lesa, pensa, diskutí, komentá i prinsipalmente kon pa pone susesonan mundial den konteksto i relatá na nos pais. Mi ta felisitá Z-86, Earl Barborda i Maharo Isenia ku e inisiativa aki. Esaki a insentivámi pa start ku un (tipo di) Think Tank ku ta publiká artíkulonan di índole internashonal i difundí e temanan aki via di e diferente plataformanan ku ta èksistí. Un bon promé paso a keda poné djadumingu pasá.

Willemstad, Kòrsou