Djis nos ta basha bai urna. Entre esnan ku ta kompetí pa bo ‘bala kòrá’ tin un grupo muchu grandi ku tin un ‘werk- en denkniveau’ leu bou di averahe, algun ku a keda konfirmá pa Korte di ta kriminal i hopi ku un ‘track record’ dudoso. Prinsipalmente, un gran mayoria ta primintí kos ku no por sustansiá manera hisa ònderstant, penshon di behes, suèldo mínimo, akseptashon obligatorio di Hulanda di nos komo munisipio igual (pa loke ta trata derechi) pero ku akseptashon di nos èksihensianan pa èksepshon (di deber), brùg den laira, baha edat di penshon mientras nos poblashon ta bira mas bieu i chikí.
E pueblo seguidó di programanan na radio i televisión ku normal ta duna informashon, den e temporada aki ta risibí pago di partidonan pa bisa loke nan ke a kambio ku e presentadó no ta kuestioná nan. No ta identifiká e programanan ei debidamente komo pagá lagando hopi hende bou di impreshon ku ta trata aki di ‘notisia informativo’.
Votamentu a start apenas na 1937, mará na hopi kondishon manera kapasidat intelektual, ‘strafkaart’ i pago di belasting. For di 1949 tur hende por vota i bai riba lista. Mi no ta proponé kambia esaki. Mi ta atvertí sí ku ta responsabilit di kada un di nos ora e ta hasi un eskoho. Meskos ku bo lo no akseptá un (èks)molestadó di mucha atendé ku bo yu, dikon akseptá hendenan sin kapasidat i integridat pa atendé ku asuntunan kolektivo di pais?
Nos ta maestro di nos destino. Pero, tambe nos ta maestro di nos frakaso, sigur si nos sigi skohe hende pa bòn di supermerkado, karchi telefòn, tshirt. Nos tin den nos man pa nos destino no ta un tristu frakaso.
Willemstad, Korsou
Alex David Rosaria Blog 
Ku interes mi ta lesa e blog akí de bes en kuando. Mi problema ta ku esnan ku ta vota pa sierto partido pasobra nan a risibí bòn pa supermerkado etc. NO ta esnan ku ta lesa e tipo di blognan akí. Asina bo ta prediká pa propio parokia. Of akaso esnan ku ta kere den Kòrsou komo munisipio di Hulanda sí ta lesa esaki? En todo kaso tur e tipo di votadónan akí di un òf otro manera ta kere den web’i gai.
LikeLike
Danki pa lesa. Tin dos kos. Hende ku ta kere den munisipio di Hulanda, i hende ku ta kere den e partido aki ku ta “bende” munisipio. E dos gruponan aki ta diferente. E ‘salesmen” di munispio ta no sa di kontenido di e issue i ta malinformá nèt esnan mas vulnerabel. E grupo aki mi no ta yega. Pasombra manera bo mes ta bisa nan ta bai tras di bòn ku ònderstan mas haltu. Bo tin rason.
LikeLike