Algun tempu pasá un persona ku awe ta prominentemente den un organization polítiko sita lo siguiente di e diskurso I have a Dream di dr. Martin Luther King Jr.: “I have a dream that my four little children will one day live in a nation where they will not be judged by the color of their skin but by the content of their character.”
Ounke ku tin hopi mas pa kana p’e deseo bira realidat -no solamente pa loke ta trata koló, pero tambe sekso, kredo, preferensia seksual, religion- no tin duda ku nos ambishon mester ta igualdat pa un i tur.
Pa mi sorpresa, e mesun persona awe ta ninga igualdat di preferensia seksual. Pues, e no tin ningun problema pa kontinuá ku un sistema di diskriminashon legal (institutionalisá) a base di preferensia seksual.
Kiko a pasa ku “kontenido di karakter”? Kisas pasombra e señora ke dikta su preferensia riba otronan? E ta haña ku su preferensia ta superior na esun di e otro grupo(nan)? Ki diferensia esaki tin ku e pensamentu di hende ku ta pensa ku e rasa blanku ta superior, ku e sekso maskulino ta superior, ku un religion ta superior na e otro òf un kultura ta mihó?
Un palanka den emansipashon di hende muhé luna pasá a bisa riba e tema di preferensia seksual ku: “tin kos mester tuma su tempu i no por bai purá”. Pues segun e palanka esnan ku a lucha pa derechi di voto pa muhé na 1948 mester por a warda te 1960, 1970, 1980 ò kisas komienso di siglo 21?
No ta trata di un fayo, ekibokashon òf omishon di e persona. E ta diskriminashon ku supuestamente tin un base religioso, pero ku ta sembra (mas) divison den nos pais. Por sierto e mes un base religioso ku a hustifiká sklabitut, diskriminashon kontra pretu i muhé.
Un kos ta sigur, e señora, huntu ku hopi mas, lo keda evaluá pa nos generashonnan ku mester bin ainda meskos ku nos awe ta evaluá e sembradónan di odio i divishon di pasado ku a kondusí na Apartheid, kolonialismo, sklabitut i leinan kontra hende muhé.
Willemstad, Kòrsou
Alex David Rosaria Blog 