E anunsio ku e kantidat di hende ku por bai urna e aña aki kompará ku 2017 a baha ku 4,000 no a parse di a shòk nos. Realisá ku ta promé biaha den historia ku tin un semehante bahada. Nos ta dal bai trankil ku nos temanan di kustumber, esta buraku den kaya, hisa ònderstant, ku dignidat ta koi kome òf no, bida personal di hende i mas.
Parse ku no ta realisá ku for di 2010 nos tin un pais. I komo un pais tin tema di importansia manera maneho demográfiko (poblashon) ku mester atendé. Sin poblashon no tin penshon, kresementu ekonómiko, entrada di belasting, benta, inovashon i asina mi por kontinuá. Kuriosamente tur partido tin e hende sentral. Adisonalmente nos poblashon di muhé ta 10% mas haltu ku e poblashon maskulino mientras mundialmente tin 0.8% mas hòmber ku muhé. Esaki ta un desbalanse indeseabel i peligroso. Nos poblashon kada biaha ta mas bieu pa motibu di fertalidat abou (kantidat di yu ku ta nase pa kada muhé) i hendenan ku ta emigrá.
Hopi opshon pa kambio no tin. Sea mester nase mas yu òf mas hende ku aktualmente ta biba afó tin bin establesé nan mes aki. E ponensia ku mas tiki e poblashon, mas bolo tin pa parti, ta un ridikules.
Ta importante kontestá dos pregunta: 1. Ki tipo di Kòrsou nos ke? i 2. Ki tipo i kantidat di hende nos mester pa logra e meta? Parse sinembargo ku ta preferá diskutí riba karetera den barionan ku ta trese voto, kon ta repartí kontratnan di limpiesa di sierto áreanan entre kontratistanan amigu di koalsishon, selashi i redashi. Mi ta komprondé. Dorpspolitiek ta fásil i ta krea ambiente. Pensa riba nos retonan ku ta afektá nos futuro ta difísil.
Willemstad, Kòrsou
Alex David Rosaria Blog 