Nos sa kiko mester pa nos ekonomia krese duraderamente. Wak: https://alexdavidrosaria.blog/2017/10/22/oecd-curacao-noncompliant-economic-reform-needed/ . Sinembargo ta difísil logr’é mientras ku tareanan ministerial ekonómiko ta repartí na e manera aktual. E minister di Ekonomia no tin instrumènt pa traha: e no tin e aspekto di forsa laboral (pa ami ‘labor’ ta antikuá) den su man, e no tin agrikultura i krio mientras peska ta repartí bou di dos ministerio, aspéktonan di energia un biaha ta kai bou di minister Presidènt minister di Finansa i parsialmente minister di Ekonomia, e no tin insentivonan ku por situmulá aktividat ekonómiko, aspektonan ekonómiko internashonal no ta transparentemente repartí i prinsipalmente e poderoso ministerio VVRP pa hopi aña a demostrá di no nesesariamente ta ‘in sink’ ku desaroyo ekonómiko.
Realidat ta ku mandatarionan tu usa nan ministerio i tareanan ministerial pa wak nan mes agènda i den esaki pone pia si ta nesesario pa koleganan. E problema ta surgi ku formashon di koalishon. Tur ke sali ‘ganadó’, haña mas tarea pa broma, i mas kompania estatal.
Partidonan for di awor mester forma un idea pa fortifiká e posishon di e próksimo minister di Ekonomia. Un minister ku banda di ekonomia manera aktualmente ta e kaso, tin e tareanan di forsa laboral, maneho energétiko, insentivonan finansiero pa ‘start-up’, inovashon i desaroyo/invershon ‘bèrdè’, planifikashon ‘smart’ di uso di espasio pa desaroyo ekonómiko i planifikashon via un ‘Planbureau’ di maneho sosio-ekonómiko largo plaso.
Probablemente mi no tin e fórmula perfekto. Pero sin kambio, e resultado ya ta konosí.
Willemstad, Kòrsou
Alex David Rosaria Blog 