Resientemente a lansa e promesa pa redusí e kantidat di Parlamentario di 21 pa 15. No t’un sorpresa ku den kampaña ta subi mesa proyektonan ‘too good to be true’ i ‘kambio’ sin a studia e materia.
Kedando na e redukshon di Parlamentarionan, realisá ku e kantidat di miembro, 21, ta determiná den Art. 40 di nos Konstitushon (Staatsregeling Curaçao). Pa kambia Konstitushon, 14 Parlamentario mester akordá esaki. Ta probabel ku e kambio menshoná mester keda akordá ku Aruba i Sint Maarten konforme e Samenwerkingsegeling den Art. 2 lèter d di nos Konstitushon. Pues, e kambio proponé por solamente den e kuadro legal èksistente.
Ta realístiko ku miembronan ta akordá pa kòrta 30% di e Parlamentarionan? Esaki konsiderando ku: e ‘kiesdeler’ ta bira mas grandi; e kantidat di voto den pre-elekshon ta oumentá redusiendo chèns di partidonan nobo; repartishon di ‘restzetels’ lo faboresé partidonan grandi; i partidonan mas chikí lo no sobrebibí. Esaki nos ke? Kiko e ta nifiká pa nos demokrasia? Preguntanan ku nan no a hasi te pa kontestá.
Otro argumento ta ku 21 miembro ta muchu pa un isla ku 160,000 alma. Pa forma un idea, ban wak Hulanda. Aya e kantidat di Konsehal ta dependé di e kantidat di habitante pa munisipio. Un munisipio ku un poblashon entre 100,001-200,000 por tin 39 representante. Pa un munisipio di entre 25,001-30,000 esaki ta 21. (Tempu di Antia, Kòrsou tabatin 14 Miembro di Staten i 21 Miembro di Konseho Insular.)
E promé rason pa redusí Parlamentarionan ta redukshon di sèn. Bèrdat. E di dos ta ku miembronan aktual ta karesé di kontenido, kapasidat mental, no ta produsí i asta ta ousente na reunionnan. Bérdat. E pregunta sinembargo: redusí e kantidat di miembronan lo sòru pa hisa e kalidat di Parlamentarionan? Apsolutamente no.
Mientras partidonan sigi pone hende inkapas riba lista i pueblo sigi vota pa nan, kalidat di Staten lo keda pésimo. Ta típiko di esnan ku ta zwai ku ‘kambio’ no ta tribi mishi ni diskutí a base di estudio i kontenido orígen di e situashon ku ke kambia. Ta preferá populismo i skohe e kaminda di ménos resistensia.
Finalmente, e aspekto finansiero, atrobe. Nesesariamente 15 miembro sin kapasidat ta mas barata i mihó pa nos pais kompará ku 21 miembro kapas ku debidamente ta hasi nan trabou? No. Kiko a stroba e proponentenan di e idea aki, òf maske ta un di e 15 listanan bin ku un proposishon pa subi kalidat di esnan ku ke drenta Staten?
Willemstad, Kòrsou
Alex David Rosaria Blog 