Prekupá pa futuro? Nos lo no tei

Despues di tira bista den programanan di kampaña i skucha algun kandidato, mi ta konkluí ku apesar ku tin 15 lista, no ta realisá ku mundu ta kambiando riba velosidat haltu. Mayoria a keda pegá den tempu, den populismo i e urgensia pa ‘score’ awor manera mundu ta stòp di èksistí ora nan no tei mas.

Mienstras tur ta papia di limpia Kòrsou i algun tokante resiklahe, no ta menshioná maneho pa redusí emishon di gas, menos desperdisio i plan den kuadro di medio ambiente i kambio di klima.

‘As we speak’ un mundu financiero paralèl ku un ròl redusí pa bankonan komersial, ‘cryptocurrencies’ ta bira un realidat mientras ta keda papia di ‘offshore’ ku for di aña 2000 a desaparesé i kon Hulanda a mat’é.

Ke redusí edat di penshon sin realisá ku nos tin un krísis di poblashon. Ménos hende ta nase, un desbalanse no-saludabel di mas muhé ku hòmber, poblashon ta bira chikí i bieu ku konsekuensianan pa forsa di kompra, ‘cost of doing business’, produktividat i sirkunstansianan soshal.

Tur ta papia di èksportashon, pero ningun di e kondishonnan ku no tei pa fasilitá komersio internashonal (World Trade Organization).

Nos ta siegu p’e influensia kresiente di China den nos region, mientras nos no ta forma punto di bista pa ku e Caribbean Initiative 2 ku probablemente e Presidente Merikano nobo lo lansa durante di e Kumbre di Amerika e aña aki pa kontra-arestá e influensia Chino aki banda.

Tin ‘democratic backsliding’ ta tuma lugá aki i otro kaminda, pero no tin intento serio pa revisá nos sistema demokrátiko i kuestioná e poder ilimitá di Parlamento.

No ke mishi ku derechi humano pa hendenan di mesun sekso pasombra nos ta mas santu ku Papa (litermente), eutanasia, ofisina di planifikashon, manipulashon genétiko, inteligensia artifisial, refineria i mas.

Nos ke pa na aña 2075 bisa: “Esnan di 2021 no a pensa riba nos (kambio di klima, maneho di poblashon, LGBTQ, sistema finansiero i geopolítika) i p’esei nos ta kore kabe’i gai, pero por lo menos nan a pone mas Kliko, drecha buraku den kareteranan i bati Hulanda?”

Willemstad, Kòrsou