Ku medida fo’i Den Haag outonomia ta sigi garna

Anteriormente mi a skibi ku nos outonomia ta den peliger, no pasombra Hulanda “ke tuma rienda”, pero pasombra nos ta malmanehá nos responsabilidatnan outónomo. Lo bo kere ku despues di 70 aña di outonomia ku nos a konmemorá riba 7 febrüari 2021, nos a progresá. Kontrali, nos a retrodesé. E medida di Den Haag awe ta resultado di akshon konsiente di 10 yu di tera den Staten ku a bòikotiá nos demokrasia i gòlpea nos dignidat komo pueblo. Hendenan ku a haña nos voto pa representá nos. Un bèrgwensa i un skòp kontra grandinan di nos outonomia manera Dòktor da Costa Gomez, Charles de la Try Ellis, Abraham Chumaceiro.

A kaso nos ta kere ku malmaneho di nos outonomia ta duna nos mas outonomia? Nos ta kere ku asina’ki nos ta mas serka di independensia?

Kada bia mas hende ta tira sèrbètè den ring i ta pèrdè konfiansa den disponibilidat i kapasidat den nos hendenan pa atendé nos asuntunan na serio. Hopi ta premirá ku si den un próksimo referèndum tin e posibilidat pa bira munisipio, esaki lo haña akohida, sigur si sali hende ku por bende e opshon aki na un manera serio. Nos lo no ta e promé pa pèrdè outonomia pa mal maneho. Puntra e pais ku antes tabata yama Kingdom of Sikkim ku a forma na 1642 i ku na 1975 a pidi India tuma over despues ku pueblo a fada di malmaneho. Awe Sikkim no ta un Reinado, pero un estado den India.

Willemstad, Kòrsou