Den vários pais, despues ku e votadó ‘ basha su bala’ e mester dòp un dede den ‘inkt’ pa evitá ku e por vota atrobe. Pero, introdukshon di ‘verkiezingsinkt’ na Kòrsou pa elekshon di Konseho Insular (KI) di 31 mei 1963, a bira un drama.
A intrudusí verkiezingsinkt pasombra: “Curaçao kan zich niet veroorloven [..] in de schijn van corruptie te staan.” Despues di debate intenso a skohe pa un inkt di DuPont koló kòrá/püs. Pa lei e votadó mester a hinka su penk robes den inkt (si e no tabatin’e, mester a hinka e penk drechi, si e no tabatin penk, por a usa kualkier dede i si e no tabatin dede, e ta pidi dispensashon.)
Apenas 10 dia promé ku elekshon, Anibal Viceisza di partido Union Popular Corsou (Un.Po.Co) ta bai Korte pasombra segun e, uzo di inkt ta kontra lei i derechi humano. Korte ta dun’é rason. KI ta kambia e lenguahe tokante di inkt den reglamento di voto, pero ta keda duda di su legalidat. Tambe, tur urna a haña instrukshon pa no usa inkt.
Mainta di elekshon Anibal Viceisza ta yega pa vota, i tenshon tabata haltu. Lo pidi’é hinka su dede den inkt? Promé ku esei a kambia e presidente di urna kaminda Sr. Viceisza mester a vota loke a trese hopi spekulashon.
Finalmente, un solushon mitar mitar: por a vota ku òf sin inkt. Tabatin miedu ku un persona por a bai Korte i pidi pa deklará e resultadonan inbálido. Ademas, segun Amigoe di 31 mei 1963 for di mainta dos hende a demostrá ku fásilmente por kita e inkt ku un simplel produkto di limpiesa konteniendo klorin.
Kombinashon di lista Partido Nashonal i Partido Independiente di Corsouw (NVP/COP) ta gana elekshon ku 12 asiento.
Willemstad, Korsou
Alex David Rosaria Blog 