Lucha kontra ignoransia i diskriminashon pa vota

• 

Derechi di voto tabata nada fásil i semper Kòrsou a keda diskriminá, pa mas ku un siglo. Ta bon nos bishitá nos historia.

Semper a tene Kòrsou atras

For di 1815 te 1937 Aruba, Boneiru, St Maarten, Statia i Saba por a vota pa nan propio dos Konsehal den nan goberrnashon lokal, yamá Raad van Politie. Kòrsou no a tabatin Raad van Politie ni derechi di voto.

Brevemente Kòrsou a bira munisipio, esta un sorto di gobernashon insular, di 1827-1833 ku 4 Konsehal, pero Kòrsou no por a vota pa su Konsehalnan. Segun Hulanda, en bista ku Koloniaal Bestuur i Koloniale Raad tabata aki, lo tabata “muchu kompliká pa e Yu di Kòrsou (YdK) distinguí entre gobernashon lokal i esun sentral.”

Na 1865 Sürnam ta haña derechi di vota promé bia pa 9 di su 13 representantenan di Parlamento. Segun Hulanda, nos no tabata madurá kompará ku Sürnam i no a haña e mes un derechi.

Bosnan pa kambio, bosnan di resistensia

Na 1869 YdK (Hudiu di koló) Généreux de Lima durante un reunion di Koloniale Raad ta pidi pa stòp diskriminashon kontra Kòrsou i duna nos derechi di voto. Segun de Lima no por ta asina ku nos ta responsibel pa e islanan mas chikí antó nan tin mas derechi ku Kòrsou.

Despues di petishon di de Lima, e Protestant blanku Hulandes, Hamelberg, ta bisa ku si hende pretu vota antó lo bin kanibalismo, adorashon di dios falsu i sèks entre hende i bestia.

Na 1895 e abogado YdK Hudiu Abraham Chumaceiro a desbaratá Hamelberg den su artíkulo: Zal het stemrecht leiden tot Canibalisme?

Na 1923 e promé organisashon polítiko di Kòrsou, de Curaçaosche Vrijheidsbond, liberal i intelektual ta manda un karta pa Reina pidiendo derechi di voto.

Den su tésis di 1935, Moises Frumencio da Costa Gomez (Dòktor) ta yama e diskriminashon kontra Kòrsou un “historische onrecht”.

Na 1937 pa di promé biaha nos a haña derechi di vota pa 10 di e 15 miembronan di Staten. Nos mester a warda 72 aña despues di Sürnam.

Por a vota na 1937 solamente hende hòmber di 25 aña òf mas, ku un entrada anual di por lo ménos F 1,200, ku tur be lasting pagá i ku un nivel intelektual di òf ekibalente na 7 aña di enseñansa Uitgebreid Lager Onderwijs. Di un poblashon di 90,000 hemde, solamente 2,100 a kwalifiká pa vota.

Staten, riba inisiativa di Dòktor na 1938 ta amplia derecho di voto pa hende menos pudiente tambe, loke ta pone un grupo lokal riku pidi Reina distruí e desishon di ampliashon di derechi di voto. Segun nan demokrasia ta na peliger si e masa vota. Reino ta rechasá e petishon.

Derechi di voto despues di tur tipo di diskriminashon

Di 1938 pa 1947 Dòktor representando Curaçaosche Roomsch Katholieke Partij ta logra derechi di voto universal ku ta mira lus na 1948.

1949, e promé elekshon pa Staten basá riba derechi di voto universal ta tuma lugá pa tur 21 Miembro di Staten.

Kòrsou mester warda te 1951 pa e vota pa promé biaha pa su representantenan lokal, esta Konseho Insular. Mas ku 135 aña despues di sobrá isla.

Willemstad, Kòrsou