Odio, venenu i hipokresia di pastornan kristian

Tempu mi tabata den partido, mi a haña invitashon di un pastor kristian pa bishitá su misa riba Corrieweg. Despues di a introdusími, e pastor a duna palabra na un señora ku kier a kompartí un“testimonio”. Aparentemente algun dia promé e a soña ku un barku grandi yen di turista homoseksual na yegada di Sta Ana ta dal kontra baranka, splet na dos i ku tur hende na bordo a hoga. E señora a haña un ovashon i e pastor a bisa “hallelujah, dios no ke homoseksualidat ni tampoko homoseksual den su reino”.

E kaso aki no ta algu insidental, pero un kustumber di tur djadumingu. Iglesianan ku ta hinka rabia i venenu den hende kontra di un minoria basá riba preferensia seksual. I ora mester, nan ta sali foi nan kueba di odio, uni i plama e venenu manera e.o. na 2019 riba Plasa Alameda ku partisipashon di Obispu i vários iglesia. Den e temporada di kampaña aki nan a bira super mòndu predikando moralidat, dunando konseho di voto pa partidonan ku tambe ta diskriminá LGBTQ. Buska e pastornan aki pa komentá riba abuzu seksual di nan koleganan kontra di mucha inosente i religiosonan enkarselá pa krimen kometé. “Muisstil”.

Persiguishon di religiosonan kontra di minoría no ta un kos di awe. Na Kòrsou tampoko. Ta konosí kon Mgr. Zeppenfeldt, Frater Radulphus i Pater Mölmann a diskriminá abiertamente hende pretu i muhé i konsiderá nan inferior. Ta konosí kon Obispado a humiliá Dòktor da Costa Gomez na su morto (1966). De fakto, religion tabata e faktor di mas grandi di divishon den nos historia polítiko.

E abuzu aki mester stòp. E hipokresia no por kontinuá. Basta ku planta odio i ninga derechi igual na e grupo di LGBTQ. Kisas lo ta bon pa wak paden i sana boso heridanan interno grave i trata na gana e outoridat moral ku boso ta prediká pero no ta praktiká.

Willemstad, Kòrsou

Advertisement