Siman pasá mi a haña 5 karchi pa vota di 5 diferente hende ku supuestamente ta biba na mi adrès den mi “brievenbus”. Mi no sa ken nan ta, pero ofishalmente nan ta biba serka mi. Esaki kier men si kualkier dia, pa un òf otro rason outoridatan mester di un di nan ku ofishalmente segun Kranshi ta registrá na mi adrès, nan lo hasi un enredada (inval) ku un apoderashon di Korte na mi adrès. Un situashon hipotétiko? No na Kòrsou.
Ta posibel bai Kranshi i deklará ku for di awe bo no ta biba na e adrès unda bo ta registrá i deklará ku bo ta muda bai biba na laga nos bisa Kaya Saguaro # 123. Esaki, sea ku e doño di kas na Kaya Saguaro # 123 ta na altura òf no. Òf si e konosebo òf laga. Kranshi ta tuma bo deklarashon i hasi e kambio. Wak:https://alexdavidrosaria.blog/2018/12/06/bo-sa-ken-ta-registra-na-bo-adres/
Pa hasi e situashon mas ridíkulo ainda, si abo ku ta biba i ta dońo di kas na Kaya Saguaro # 123 bai reklamá Kranshi i pidi pa kambio, nan ta eksihí un pèrmit di esun ku ilegalmente a inskribí su mes na bo adrès.
Esnan ku a pasa den e trastorno aki por konta di nan frustashon ku e situashon i sigur esnan ku a èksperensiá e spantu ora un batayon di agente armá drenta nan kas en buska di kriminal i evidensia kriminal. I no papia mes di e kantidat di hende ku kier a vota, pero no tabata por pa motibu di Kranshi.
Mas ku tur kos, e situashon ku mi a deskribí ta indikativo di un pais den desorden. Mester tuma akshon òf nos ta warda pa Hulanda hala nos orea? Mi a komprondé ku no ta asuntu di falta di lei , pero falta di aplikashon di e lei.
Willemstad, Kòrsou
Alex David Rosaria Blog 