Ounke kon ignorante i tristu bo konsider’é, e realidat ta ku un grupo muchu grandi di hende ta biba den un mundu di fantasia di konspirashon lokual ta stroba e proseso di kombatí i prevení covid-19 via bakuna.
Aña pasá mi a skibi di un movementu “anti-bakuna” (anti-vax) ku fervientemente ta plama e teoria ku hende mester keda leu for di tur vakuna, sigur COVID 19. Ta bisa ku tin “chip” den e bakuna, ku e bakuna mes ta kontené e virus, ku gruponan illuminati (entre otro sernan mitar hende mitar rèptil) ta tras di e pandemia. Asta un èks minister di Enseñansa resientemente a deklará ku “no ta sigur ku covid ta èksistí”.
Na komienso di 2019 e Organisashon Mundial di Salú di Nashonnan Uní (WHO) a designá e movementu anti-vax den e top-5 menasanan mas grandi pa salubridat mundial. Sifranan ta mustra ku anti-vax den su lucha kontra bakuna kontra sarampi a sòru ku sarampi (un infekshon mortal ku kasi a desaparesé for di pantaya for dia tin un bakuna) mundialmente a subi ku 30%.
P’esei ta prekupante ku sigur un (1) partido ku lo tin representashon den Staten a bisa ku “kada ken ta liber pa tuma e bakuna si òf no.” Kual sea e motibu ku un hende ta skohe pa no tuma vakuna, e mester realisá ku su eksoho personal tin konsekuensia pa su prohimó i salubridat públiko. Ménos hende bakuná, mas difísil ta pa protehá nos komunidat ya ku e malesa lo sigi plama, ounke mas poko poko.
Ta importante pa nos papia e mesun idioma: “Bai bakuná”. Tur partido, religioso, organisashonnan no-gubernamental, mester stimulá nos komunidat pa bai bakuná i sigi tene distansia físiko, bisti tapa boka i evitá aglomerashon. Si algun bes den nos historia tabatin e nesesidat pa uni, t’esaki. Bai bakuná.
Willemstad, Kòrsou
Alex David Rosaria Blog 