Problema di salú relashoná ku Covid-19 no ta desaparesé después di bakuna

E kampaña pa bakuná kontra Covid-19 ta kana i mi ta konsider’é un éksito. Tambe e kampaña pa mas ku un (1) aña pa frena e malesa kontagioso basá riba kapasidat di kama den hospital. Pero nos mester realisá un kos promé ku nos selebrá. Covid-19 i su konsekuensianan ta muchu mas ku e sòm di konta kama i e kandidat di poblashon ku a bakuná.

Nos mester realisá ku un grupo grandi di persona ku a rekuperá (òf kura) di Covid-19, tambe esnan ku tabatin simptómanan leve, ta keda pa lurgu tempu ku problemanan di salú. E tèrminologia ku ta usa ta ‘post Covid-19 conditions’. Esnan prinsipal ta daño na kurason, pulmón i selebre. E delaster aki por kondusí na Alzheimer, Parkinson i Guillian-Barré. Adishonalmente un grupo grandi di hende ta sufri di depreshon, ansiedat i otro malesa mental. No papia mes di hendenan ku a pèrdè un ser kerí. E siman aki mi a papia ku un hende ku a pèrdè su kasá despues di un matrimonio di 34 aña. Ku awa na wowo e a kontami kuantu di e ta sufri di soledat ku ta keda asentuá pa e lockdown i medida di plachi di number.

Mi no ta médiko, ni mi ta trata di aparentá di ta unu. Loke mi ke atvertí p’e ta pa nos no keda konsentrá solamente riba bakunashon i prevenshon. E ekipo di pandemia mester keda ampliá for di awor ku profeshonalnan pa atendé i ku aspektonan di salú mental i ‘post Covid-19 conditions’. E ekipo ampliá aki mester bin dilanti i duna informashon. Nos no por pèrmití nos mes di ignorá esaki. Final di kuenta, manera Nashonnan Uní a bisa: “We are in this for the long haul”.

Willemstad, Kòrsou