Un minoria ku no ke bakuná tin nos isla rehén

Un minoria muchu grandi aki na Kòrsou ta pone nos tur su bida na peliger, stroba aktividat ekonómiko, prolongá sufrimentu den nos kasnan pasombra nan no ke bakuná kontra di Covid.

Nan no tin ningun rason basá riba siensia pa nan desishon. Pero teroria di konspirashon si nan tin de sobra:

-“E bakuna a keda kla muchu lihé,” komo si fuera e miónes di hendenan ku a muri promé no ta nada. Ta míles di sientífiko rònt mundu a traha riba un bakuna basá riba sierto trabounan ku ya a keda hasí pa kombati SARS den pasado.

– “Nos fé den religion, brua i kosnan okulto ta protehá nos,”, ounke ku no tin prueba sientífiko pa esaki.

“Mi ta fuerte, salú i mi kurpa mes ta protehami.” Esaki, lubidando ku ounke kon fuerte bo kurpa ta pa protehá abo e no por protehá otronan rònt di bo ku no ta mes fuerte ku bo, manera bo wela. No lubidá ku sierto hende manera esnan bou di tratamentu di kimoterapia no por bakuná. Mas hende ku si por bakuná keda sin bakuná, ta pone e pashèntnan aki di kanser den un peliger grandi.

E asuntu no ta solamente pa bai bakuná, pero pa hasi esaki mas lihé posibel. Mas nos tarda, mas sufrimentu lo tin, mas ekonomia lo bai atras, desempleo lo krese i mas espasio e virus ta haña pa mutua (kambia di forma).

Ami ku si a bai bakuná pa protehá mi mes, mi sernan kerí, pueblo i humanidat no ta dispuesto pa keda rehén di terkedat di un minoria ku no ta kere den bakunashon. Ademas, mi ta kere ku mester tin konsekuensia pa esnan ku ta peligrando salú i pan di hopi hende riba e isla aki i rònt mundu. Esaki ta e siguiente fase.

Willemstad, Kòrsou

Advertisement