Pakiko tantu helengue pa despues bisa ku ta negoshá?

Ta resultá ku ta sigi negoshá ku Hulanda tokante Coho. Pakiko tur e helengue di Plan B, histeria tokante chantahe i menasa di parti skòp. Akaso esei a yuda nos posishon di negosashon?

Kiko tabata e Plan B ku e dos partidonan a anunsiá ku lo hasi yudansa Hulandes superfluho? Lógika ta bisa ku pa konkluí ku no mester di plaka di Hulanda, mester tin su tras hinter un análisis sostené pa sifra. Esaki no a sosodé. A gaña nos.

Mientras tantu e ‘score’ Kòrsou-Hulanda ta na fabor di Hulanda sin sikiera ku e a mishi ku e bala. Nos a presta di hinka algun outogol, hasiendo nos mes ridíkulo i debilitando nos situashon.

Alentador ta ku ta bai negoshá ku Hulanda. Por sierto meskos mi a bisa na un foro organisá pa Partido Nashonal (PNP) fin di ougùstùs 2020( http://www.alexdavidrosaria.blog/2020/08/28/diskurso-tokante-pakete knops/: “Te awor no tin un mihó alternativa pa e oferta di Hulanda. Apesar ku na mi manera di mira e pakete no ta sólido, nos no mester rechas’é.”

Tambe mi a remarká ku nos no mester mira e oportunidat aki di e manera tradishonal di mendigo, esta saka man i pidi mas plaka posibel: “Si nos ke mira e pakete aki komo unu pa desaroyo, manera ami ke mir’é, Kòrsou mester pone su stèmpel di vishon di desaroyo.”

Mi a enfatisá ku pa nos logra mester sinta na mesa ku Hulanda: “[..] mi ta kere ku nos mester por dialogá ku Den Haag i hasi di e pakete di Hulanda un pakete di nos, un pakete ku ta sirbi nos den nos afán pa karga nos responsabilidat [komo pais outónomo].”

Kisas e futuro Fòrti por siña di mr. dr. Moises da Costa Gomez (Dòktor). Apenas e promé Konferensia di Mesa Rondó (RTC) a start na komienso 1948, partido Demokrat (DP) ku tabata den e delegashon Antiano, a pone kuchú riba mesa i a eksihí ku si Ulanda no rekonosé nos outonomia, e ta bandoná e RTC. DP ta lanta for di mesa i bai denunsiá Hulanda durante un konferensia regional na Venezuela. Dòktor a keda na mesa. Ora e RTC a tèrminá eksitosamente riba 18 di mart 1948 a keda demostrá ku Dòktor tabatin rason pa bisa ku ta na mesa bo ta prevalesé i no ora bo bandoná esaki. I mi ke añadí ku tampoko bo ta logra dor di papia disparati.

Willemstad, Kòrsou

Advertisement