Diskushon manera tin aktualmente rònt di e kandidato pa minister di Ekonomia no ta nobo. Mi no ta komentá e kaso aktual, pero ta trata e promé kontroversia den historia tokante un kandidato pa minister, esta Sr. F. Karner pa e kartera di ekonomia den Gabinete (Dòktor) da Costa Gomez na 1952, esta leu promé ku lei di ‘screening’.
E di dos elekshon pa Staten di Antia a base di derechi di voto universal tabata riba 21 desèmber 1950 i e Staten a sinta riba 21 febrüari 1951. Gabinete da Costa Gomez tabata konsistí di: Partido Nashonal (PNP), Arubaanse Volkspartij (AVP), Katholieke Volkspartij (KVP) i Curaçaose Onafhankelijkpartij (COP). Riba 17 aprel 1951 Staten konforme su tarea a ‘screen’ i aprobá tur minister.
Vakminister di Ekonomia, Cecil Delvalle, ta anunsiá su retiro komienso di febrüari 1952 i Dòktor ta proponé kandidato F. Karner un profeshonal di sektor privá. Protesta a surgi pasombra Karner a nase na Oustria. Ounke ku Karner a nashonalisá bira Hulandes no tabata konsider’é Hulandes ‘outéntiko’. Den e reunion di Staten riba 14 di febrüari 1952 pa ‘screen’ e kandidato, emoshonnan tabata haltu. Korant Amigoe a yama esaki e siguiente dia “een weinig opbeurende vertoning”. Segun nótulonan algun parlamentario a konsiderá nombramentu di un Oustríako un paso atras den nos outonomia (optené na 1951). Pa otronan, e papel di Oustria den di Dos Guera Mundial na banda di Alemania, tabata motibu pa deskualifik’é.
Dòktor a trata na tur manera splika dikon mester pone e mihó hòmber na e puesto i ku outonomia no ta kuestion di èkskluí hende. Ora di vota a resultá ku Dòktor no por a kombensé tur ku tabata sostené su Gobièrnu. Karner ta keda nombrá ku un base smal, 10 voto na fabor i 7 kontra.
Willemstad, Kòrsou
Alex David Rosaria Blog 