31 di mei ta Dia Internashonal Sin Tabako. Tabako i nikotina mundialmente ta mata 8 mion hende pa aña, inkluso 1,2 mion no-humadó ku ta inhalá huma i nikotina di e humadó. Apesar ku a logra konsientisá tokante dañonan di tabako, kompanianan a haña un otro manera pa prinsipalmente hóbennan bira adikto na nikotina: sigaria-elektróniko òf ‘vaping’. Awor mas ku nunka mester di regulashon i lei kontra ‘vaping’.
Algun aña pasá komo Parlamentario mi a introdusí un lei kontra humamentu den lugánan será ku e meta pa protehá e no-humadó. Tambe mi a laga legislashon atras na 2016 pa etikèt obligatorio ku ta atvertí pa peliger di morto di produktonan di tabako i nikotina i un di dos tokante edat mínimo pa kumpradó di e produktonan aki. Ta di spera ku ta tuma akshon pronto.
Akseptashon di e lei kontra humamentu den lugánan será a surpasá tur èkspektativa.
Negoshinan involví den tabako i nikotina a haña un otro manera pa introdusí nikotina den kurpa humano, esta ‘vaping’ . ‘Vaping’ ta tuma lugá ku un aparato di bateria ku ta kenta un líkido konteniendo nikotina i krea vapor (‘stoom’) ku seguidamente e humadó ta inhalá. ‘Vaping’ ta relativamente nobo i no ta den e lei pa protehá e no-humadó. E tempu ei no tabata tin sifranan definitivo kon malu ‘vaping’ di nikotina ta.
Awe ta sientífikamente probá ku ‘vaping’ ta malu pa salú pasombra e ta kousa malesa króniko ku ta afektá pulmon i kurason. Sigaria elektróniko ku ta kontené nikotina i sigaria konvenshonal ta mesun adiktivo. ‘Vaping’ ta keda merkadiá na hóbennan komo algu ‘super cool’ i esaki lo sòru pa hinter un generashon nobo bira adikto na nikotina. Rason sufisiente pa polítika, sektor di kuido i instanshanan pa prevení kanser bini huntu pa atendé ku e frontera nobo di adikshon na nikotina.
Ta di spera ku ‘decion makers’ i ‘influencers’ den nos komunidat konsientisá riba e peligernan di morto prematuro di ‘vaping’. Nos mester di lei i regulashon riba e tereno aki. I pronto.
Willemstad, Kòrsou
Alex David Rosaria Blog 