Kasi un dékada atras mi a lansa e idea di un union di idioma pa loke ta trata Papiamentu/Papiamento (Taalunie Papiaments) ku lo mester enserá e islanan Aruba-Boneiru i Kòrsou. Pa falta di interes di e koalishon ku mi tabata forma parti di dje, e idea a keda te einan. Un idea ku nunka a keda investigá.
Un union di idioma normalmente tei pa desaroyá i stimulá maneho ku e meta pa hasi nos idioma mas fuerte. Esaki dor di konseho, stardardisashon, aplikashon den enseñansa, investigashon, modernisashon i kon atendé (mi no kier men eliminá) desviashon di idioma riba e diferente islanan. Praktikamente tur union di idioma (manera esun di idioma Hulandes) tin komo meta pa atendé ku e kuestion di desviashon.
Mi no ta ligwista, ni mi ta pretendé di ta unu. Lokual si mi ta kombensí di dje komo un globalista, ta ku union riba sièrto terenonan ta deseabel, prinsipalmente ora tuma nota ku segun Nashonnan Uní den último 70 aña mas ku 230 idioma a desaparesé for di mundu. Huntu ku e idiomanan aki tambe un sèt di èkspreshon kultural a evaporá pa semper. Un union ABC di idioma Papiamentu/o ta sumamente nesesario pa konservá i elevá nos idioma komun. Tambe e por bira e chispa pa mas koperashon strukturá entre e islanan ABC.
Willemstad, Kòrsou
Alex David Rosaria Blog 