Un bista den nos historia ta demostrá ku semper a mira struktura estatal komo e solushon pa nos reto i problemanan. Despues di konkista, Hulandesnan a dirihí nos komo un entidat (semi)hurídiko (i no komo un propiedat privá) primeramente for di Recife, despues Nieuw Nederland i despues Amsterdam. Rònt di 1804 ta organisá nos den un Raad van Policie. Di 1816-1828) e seis islanan ta bira dos kolonia separá (Kolonie Curaçao i Kolonie Sint Eustatius). Di 1820-1845 e dos kolonianan ta djòin kolonia Sürnam ku un sólo Gobernadó na Paramaribo. Di 1828-1833 ta kombertí isla Kòrsou den un munisipio. No satisfecho ku e islanan Hulandes, na 1845 ta hinka tur seis den un sólo konstelashon konosí bou di vários nòmber: 1. Curaçao, 2. Curaçao en Onderhoorige Eylanden, 3. Staatsdeel Curaçao 4. Gebiedsdeel Curaçao i 5. Nederlandse Antillen.
For di despues di Statüt (1954), nos ta esnan ku a kreativo. Ya na 1955 Gezaghebber di Boneiru, Weis de Hasseth ta pidi Konseho Insular para (parsialmente) e outonomia ku Boneiru a kaba di haña pasombra “outonomia lo hiba Boneiru atras”. E ta proponé hasi Boneiru parti di teritorio insular di Kòrsou òf un Federale district van de Nederlandse Antillen.
Despues no tabatin un smak di eiskrim ku nos no a purba: Nieuwe Unie, Mankomunidat, Federashon Kòrsou-Boneiru, Provinsia, Estado Liber i Asosiá, UPG, Munisipalidat, Directe Banden, Koninkrijkseiland, Antia Nobo, Antia Restrukturá, Integrashon den Venezuela, Independensia i loke final di kuenta nos tin, esta Kòrsou Outónomo den Reino for di 2010.
Ketu bai nos ta buska e struktura estatal perfekto, e remedi mágiko ku somehow lo resolvé tur problema ku ni sikiera ta di índole konstitushonal: enseñansa, infrastruktura, mentalidat di kompleho, struktura ekonómiko antikuá, falta di konekshon komershal global.
Na 1938 durante di e delaster reunion di Koloniale Raad, su Presidente, Sr. Jossy Henriquez, a atvertí ku kos no ta drecha ku un struktura nobo. Avanse ta dependé prinsipalmente riba kapasidat di esnan ku ta manehá e struktura.
Garantisá ku e kartanan konosí di defisiensa demokrátiko den Reino (pero no ta papia di nos mes defisiensia demokrátiko), sklabitut, West Indische Compagnie, Calvinisme, i tur tipo di viktimalisashon lo aparesé. Enbes di wak otro den kara i akseptá nos fayonan, nos debilidatnan i traha duru pa bai dilanti.
Willemstad, Kòrsou
Alex David Rosaria Blog 