2 yüli 2021: 70 aña nos mes gobièrnu

Sr. Gorsira, e promé Presidente di Konseho Insular

2 di yüli ta históriko pasombra eksaktamente 70 aña pasá, gobernashon propio pa Kòrsou a start. Ta tristu ku riba 2 yüli solamente ta para ketu na nos bandera ku tres dékada despues (1984) a keda subí pa di promé biaha. Un pensamentu ta pa riba 2 yüli selebrá “Dia di Bandera i Gobernashon Propio di Kòrsou”.

Outonomia a start ku Interimregeling riba 7 febrüari 1951. Basá riba esaki, nos promé Konseho Insular (KI) a sinta, despues di e promé elekshon pa KI riba 4 yüni 1951. Pues 2 di yüli 2021 ta selebrá 70 aña di gobernashon propio.

E promé 21 miembronan di KI tabata pa NVP: Hendrik Pieters Kwiers, Ernesto Rozendaal, Angela de Lannoy-Willems, Benjamin Römer, Philip Cohen Henriquez, Edward Broos, Romano Tschumie, Heraclio Henriquez, Charles Voges; pa DP: Efraim Jonckheer, Ciro Kroon, Ramez (Ronchi) Isa, Steef v.d. Meer, Cornelis (Nene) Hueck, Louisa Van der Linde-Helmijr, Julio Rosario i Tjerk Petzoldt; pa KVP: David Capriles, Elias Morkos i Jonchi Jonckhout; pa COP: Philip Evertsz. E promé diputadonan tabata: Jonchi Jonkhout (KVP), Philip Cohen Henriquez (NVP), Ciro Kroon (DP) i Gerald Sprockel (NVP).

S.E. Gobernador Struycken den su diskurso na apertura di KI ta bisa: Een eigen orgaan voor de behartiging van zijn belangen schept voor Curaçao grotere mogelijkheden dan ooit tevoren om de lens scherper in te stellen op de eigen problemen en mogelijkheden.

Michael Gorsira, e promé Presidente di KI, a resumí e importansia di gobernashon propio na Papiamentu (e promé biaha ku a usa Papiamentu den KI): Laga nos tur rekordá ku di awor en adelante nos lo haña e gobièrnu ku nos mes trese na poder i ku nos mes lo mester karga tur responsabilidat pa tur e loke e gobièrnu aki hasi. Laga nos demostrá responsabilidat. Esei lo ta e mihó prueba ku nos por duna ku nos meresé e outonomia ku tantu nos a anhelá.

Ta bálido pa analisá kon leu nos ta den e proseso pa usa gobernashon propio pa resolvé nos problemanan. Felis Dia di Bandera. Felis Dia di Gobernashon propio.

Willemstad, Kòrsou