Emperador Haitiano a biba na Kòrsou

Despues ku a kore ku n’e for di Haiti, Emperador Haitiano Faustin l (Fautine-Élie Soulouque) eventualmente a bin buska refugio na Kòrsou pa algu mas ku un (1) aña. E Emperador a biba na Hoogstraat 11A ku tabata forma parti di un kompleho di monumentu situá riba un tereno di 1,290 meter kuadrá. Esaki a bira konosí komo Keizershof.

Kon bin e Emperador a resultá na Kòrsou? Na 1844 Repúblika Dominikano (RD) ta bira independiente di Haiti. Na 1847 Sr. Soulouque (1782-1867) ta keda apuntá komo presidente di Haiti. Na vários okashon e ta purba rekonkistá RD, pero sin éksito. Na 1849 e ta keda proklamá Emperador Faustin I i tres aña despues e ta keda koroná. Na 1859 militarnan di su mes pais ta lanta kontra di dje despues di algun derota militar.

Emperador Faustin l ta bai den eksilo na Jamaica. Su estadia eynan a dura 6 aña. Un revolushon sangriente ta fòrs’é kue un barku di Kòrsou, Rigolette, i ta yega nos isla ku algun siguidó, entre otro su yu La Princesse Royale, riba 19 desèmber 1865.

E ta residensiá na Hoogstraat 11A kaminda pa algu mas ku un aña e ta biba i tambe ehersé algun funshon komo emperador di Haiti. Na komienso di 1867 e ta regresá Haiti kaminda poko despues e ta muri.

Despues ku Emperador Faustin 1 a bandoná Kòrsou, Keizershof a dekaí i keda bandoná. Ningun di e poseshonnan -aparentemente spektakular- di Emperador Faustin l ku e a laga atras, a sobrebibí. Medio añanan 90 algun empresario Hulandes a rehabilitá e monumentunan i ta krea aktividat turístiko i di horeca. Tambe a re-establesé e nòmber Keizershof. E edifisio original na e adrès Hoogstraat 11A no a sobrebibí e rekonstrukshon.

Ta basta konosí ku Simón Bolívar i Juan Pablo Duarte a bin buska refugio aki na Kòrsou. Poko konosí ta e historia di Emperador Faustin l. Ta di spera ku ta hasi algu, eventualmente ku koperashon di Haiti, pa e parti di historia interesante aki no bai pèrdí.

Willemstad, Kòrsou

Advertisement