Promé ku e diskushon pa eliminá e moneda di 1 sèn, seis luna pasá mi a proponé den un ‘blog’ pa elimin’é pasombra su balor monetario ta kasi nihil i finansieramente e no ta responsabel pa mantené. Aki bou e ‘blog’.
Na 1926 minister di Kolonia a aserká Gobernadó di Kòrsou pa eliminá e moneda di 1/2 sèn den sirkulashon. E motibu tabata ku e kosto pa trah’é tabata mas ku 1/2 sèn. A dura pa eliminá e moneda, mientras Hulanda a eliminá su 1/2 sèn na 1940.
Awe e moneda di 1 sèn tin 20 biaha ménos balor kompará ku 1921 konsiderando inflashon. Ademas e tamaño chikí i inpráktiko ta pone ku fásilmente e ta kai pèrdè, djis ripará kuantu 1 sèn bo ta mira abou sin ku hende ta tuma molèster pa rekohé nan. Kontamentu di e moneda na establesimentunan i banko ta un aktividat kostoso. E kontinuo skarsedat di e moneda ta pone ku e kumpradó na hopi okashon ta paga di mas. E skarsedat ta e resultado lógiko ku e moneda aki ta ‘desaparesé’ di un manera òf otro for di sirkulashon. Na sierto tienda, restaurant ya kaba den práktika tur preis ta den denominashon di 5 sèn.
Klaro ku tin sierto desbentaha pa eliminá e moneda. Un banda semper tin konsiderashonnan sentimental. Tambe, ku eliminashon di e moneda tur preis mester keda ahustá. Normalmente un produkto di NAf 2,51 òf 2,52 mester bira NAf 2,50. Un produkto di NAf 2,53 òf 2,54 mester bira NAf 2,55. Lo tin abusu (manera ta tuma lugá debí na skarsedat). Un estudio ta un mester.
For di 2008 nos lo por a diskutí e materia aki despues ku a disidí ku nos pais ta haña e Florin Karibense, abreviá CMg, na 2010. E trein ei a bai laga nos sinembargo ya ku Banko Sentral di Kòrsou i Sint Maarten ta morto na soño. Tambe, pronto nos lo kibra nos rèkòrt mundial di ta usa un moneda pa kasi 11 aña di un pais ku no ta èksistí, esta Antia Hulandes.
Sin estudio (ku mi ta na altura) a determiná ku lo eliminá papel di Naf 25 i introdusí papel di CMg 20, ounke ku nos tin dies aña den espera. E aspekto di moneda di 1 sèn no a keda diskutí. Mi ta kere ku su tempu a yega.
Willemstad, Kòrsou
Alex David Rosaria Blog 