Ei nos ta!

Kasonan di COVID ta subi èksponensialmente espeshalmente bou di esnan no-bakuná. Alimentando e tendensia aki ta un grupo ku ta hiba un kampaña perverso pa mas tantu hende posibel keda sin bai bakuná. Kiko ta nan intenshon? Mas morto, mas desempleo, otro ‘lockdown’ pa kaba di choka nos ekonomia?

Na Cuba hende a subi kaya pa entre otro protestá falta di bakuna konfiabel manera nos si tin na Kòrsou i sin ku mester paga p’e. Nos minister di Salú Públiko aparentemente no ta para tras di e kampańa di bakunashon, pero ta preferá keda vago si e mes a bakuná. E minister enkargá ku Ekonomia i Asuntunan Soshal ta ripití ku bakuna ta un eskoho opshonal, personal i ta kontra pa un dunadó di trabou obligá un trahadó bakuná ounke ku esaki tin kontakto di aserka ku kliente manera un ‘bartender’. Ni Presidente di Konseho di Minister ni Miembronan di Saten a duna kara.

Akaso nos no ta konsiente ku tin un pandemia? Akaso esnan ku ta instigá kontra bakunashon no ta na altura ku mas hende keda sin bakuná mas oportunidat e virus ta haña pa transformá bira mas peligroso? Nos ta na altura ku si nos keda chambuká, mas gastunan di salubridat públiko ta subi loke ta nifiká ménos plaka pa hasi otro kos pa pueblo?

E ekipo di èksperto ku a hasi un bon trabou pa mas ku un aña, mester aktivá rápidamente. Mi ta spera ku pronto Korte ta determiná legalidat di kita hende for di trabou ora e no kier bakuná. Esaki en bista ku mandatarionan te ainda falta kurashi pa indiká ta kua direkshon mester bai. Nos mester komprondé ku no ta èksistí un minister di Salú Personal, sino un minister di Salú Públiko. E ‘bien’ públiko ta konta mas ku un eskoho personal basá riba un krehensia personal ku ni sikiera tin base sientífiko.

Akaso nos ku a bakuná no tin derechi? Akaso nos mester sinta wak kon un grupo kier bolbe tuma mi pais i pueblo rehen ku teorianan maligno di konspirashon i mentira flagrante?

Mester laga doñonan di trabou ku ta ninga di tuma akshon kontra empleadonan no-bakuná sa ku nos komo kumpradó lo bòikotiá nan. Si nan no ke tende, nan mester sintié den nan pòtmòni.

E bakuna no ta perfekto. E ta protehá pa 94%. Pero e benefisionan di e bakuna no por para banda di e riesgonan desastroso di e malesa kontagioso aki. Ta di spera ku outoridatnan ta hasi loke mester hasi pa para e direkshon robes ku nos a kue último simannan.

Willemstad, Kòrsou