Riba 10 yüni 1948, Staten van Curaçao a informá Hulanda via telegram ku e órgano aki ta den wèlga i lo no kumpli ku su tareanan legislativo. E wèlga, algu úniko den nos historia, a dura dos luna.
Kiko a sosodé?
Riba 8 di yüni 1948 nos konstitushon a keda kambiá pa hasi posibel formashon di un College van Algemeen Bestuur (C.A.B.) pa asistí Gobernadó den ehekushon di su tareanan. Kreashon di C.A.B., un sorto di Konseho di Minister di awe, tabata un paso grandi den nos proseso di emansipashon polítiko lokual un siguiente biaha lo mi amplia.
Gobernador Petrus Kasteel ta informá Staten riba 10 yüni 1948 ku Hulanda a ofres’é un posishon den èksterior i ku e mester tuma retiro den yüli i ku mester warda ku instalashon di C.A.B. te ora e próksimo Gobernador keda instalá.
Aki Colón a kima. Staten no a akseptá e instrukshon di Hulanda i a vota ‘wall-to-wall’ pa manda un telegram di protesta pa Reina yamando e desishon aki inkonstitushonal. I, ku mientras Hulanda no keda kontestá, Staten ta wèlga i no ta kumpli ku su tareanan. Miembro di Staten Jonckheer a bisa: Ware het niet, dat het Curaçaosche volk een geduldig, rustig volk is [..] zou de bevolking in opstand zijn gekomen.
Staten no a bèk pero a bin huntu despues di un luna den yüli pa akordá Cornelius Süthoff komo Gobernadó interino i despues di un luna pa risibí e Gobernador nobo, Leonard Peters.
Riba 10 yüni Hulanda ta keda kontestá Staten i bisa ku ta un “misverstand” di parti di Staten a pone ku esaki a konkluí ku e desishon pa warda ku instalashon di C.A.B. tabata inkonstitushonal.
Sr. A.D. Jonckheer ta haña e tarea pa forma C.A.B.. pero dos kandidado no ta pasa ‘screening’. Sr. W.R. Plantz ta bira formadó i ta logra kompletá su tarea pa asina riba 21 ougùstùs e promé C.A.B. keda instalá.
Willemstad, Curaçao
Alex David Rosaria Blog 