No konfundí trabou di Staten ku ‘cheerleading’

Mientras no tin un alternativa sientífikamente komprombá, e manera mas efisiente pa kombatí COVID ta keda bakunashon. Mientras e virus keda biba pa motibu ku muchu hende no bakuná, e ta haña espasio pa adaptá i infektá prinsipalmente esnan no-bakuná, pero tambe esnan bakuná. Mi a i ta desaprobá e maneho di e mandatario enkargá ku Salúbridat ku te ainda no kièr bisa ku e ta para tras di bakunashon, pero ta skonde tras di privasidat. E mandatario konsientemente ta empoderando esnan ku agresivamente ta kampañá kontra di bakunashon, inkluso un grupo (di sekta) Kristian poderoso na plaka. Por sierto otro prueba ku Kristianismo ta hambrá pa poder polítiko (https://alexdavidrosaria.blog/2021/06/26/religion-ta-bek-den-politika/) manera den añanan 40.

Kisas e ‘cheerleader’ di mas grandi den Staten di e mandatario di Salubridat ku a sali tira moketa pa loko (Extra, 20 yüli) riba mi ‘blog’, lo por a konsentrá riba kontenido. Awor, ta konosí ku ni sikiera e sa kon ilegalmente graba reunionnan konfidenshal di Staten sin keda gará. No ta ami a bisa, sino tres Korte independiente. Tambe, tempu ami tabata den Staten a produsí tur aña presupuesto ku saldo positivo. I pa loke ta trata asesinato di Sr. Wiels ku segun e a bisa den korant: “mi minister no por a solushoná” un pregunta. Dikon bo no a preshoná bo kolega di partido ku awe ta den prizòn pa 30 aña pa asesinato di Sr. Wiels, p’e konfesá su akto kriminal? Esaki lo a solushoná e kaso mas lihé.

Willemstad, Kòrsou

Advertisement