Nos sa kiko mester hasi pa ekonomia krese duraderamente*. Sinembargo ta difísil logr’é mientras e tareanan ekonómiko ta repartí na e manera aktual.
E titular di Ekonomia no tin sufisiente instrumènt pa traha. E no ta responsabel pa forsa laboral, agrikultura i krio mientras peska ta repartí bou di dos ministerio. Aspéktonan di energia kada biaha ta kai bou di un otro minister. E no tin insentivonan ku por situmulá aktividat ekonómiko i aspektonan ekonómiko internashonal no ta transparentemente repartí. E poderoso VVRP pa hopi aña a demostrá di no nesesariamente ta ‘in sink’ ku desaroyo ekonómiko.
Kasi tur mandatario tu usa su kartera konforme su agènda (polítiko) i den esaki ta pone pia, si ta nesesario, pa koleganan. Repartishon di tarea ta mas bien un wega di ken por sali ganá, haña mas empresa di gobièrnu (i nombra amigu komo komisasio) ora negosiá kartera.
Klaro ku tur mandatario (den teoria) mester traha huntu, pero den nos kaso tareanan ekonómiko ta plamá bou di por lo ménos sinku ministerio. Nos a pèrdè un bon oportunidat pa fortifiká e posishon di e minister di Ekonomia algun luna pasá ora a forma un gabinete.
Na Aruba Raad van Advies na tres okashon a duna konseho pa trese un repartishon mas efektivo di karteranan ministerial. Nos bisiña por lo ménos ta pensa riba kambio. Ta tempu pa Kòrsou tambe hasi esaki.
Willemstad, Kòrsou
*https://alexdavidrosaria.blog/2017/10/22/oecd-curacao-noncompliant-economic-reform-needed/ .
Alex David Rosaria Blog 