Resientemente na entiero di mi amigu Ced Ride ku kende mi a kolaborá pa yega na e kanshon, Dòktor mester keda biba semper den nos mente, un mandatario ta anunsiá kreashon di teatro nashonal Ced Ride.
Mi no por ta kontra rekonosementu pa Ced. Pero, kon a yega na e desishon aki? A konsiderá Teatro Jacobo Naar, Lelia Capriles òf Rina Penso? Teatro Laura Quast, Guillermo Rosario òf Harold Martina? Pakiko no? Kiko tabata e kriterionan? Òf tabata simplemente un zèt populista pa ‘score’?
Juist. Manera muchu kos na Kòrsou, aki tampoko tin maneho transparente ku ta karga aprobashon di diferente ‘stakeholder’ relevante. Kon otro por splika ku ningun hende ta papia di nos poblashon indígeno, Caiquetío? Dikon un Hariri den un drumi lanta ta haña un plasa mientras nunka a atendé e petishon pa rekonosementu pa Damanan di Djarason*? Kon por splika ku hopi Gobernador Hulandes tin nòmber di kaya pero ningun Gobernador yu di tera tin esaki? Dikon Hamelberg tin un kaya den Otrobanda konsiderando ku e tabata kontra pa hende pretu vota? Di otro banda, Charles de la Try Ellis, e promé yu’i tera ku a doktorá den lei (aisina mes, promé ku Dòktor da Costa Gomez) i un di e outornan intelektual di Statüt, ta un deskonosí?
Mi ta pro onra nos hendenan. Totalmente. Pero pa rèspèt pa nos pueblo i baluartenan, esaki mester sosodé a base di maneho transparente i bon deliniá. Asina’ki ta garantisá ku tur hende, a base di nan logro -i no beis di un mandatario- tin e oportunidat pa via di un ‘level playing field’ gana nan honor.
Willemstad, Kòrsou
Alex David Rosaria Blog 