Opshon ‘provinsia’ ganando tereno

Tin vários grupo -te ainda den relativo silensio – na hopi parti di Kòrsou kòmbersando riba i konsiderando e opshon pa integrá den Hulanda/Oropa. Sea ‘opshon BES’, ‘UPG’, ‘provinsia’ òf ‘munisipio’. Kisas mas palpabel ta ku hendenan ku algun tempu pasá tabata tur-tur ku outónomia, awor ta faboresé integrashon. Pakiko? A mal manehá nos outonomia i no a kumpli ku e promesa di bienestar pa pueblo. Konsekuentemente tin un falta di konfiansa den nos hende i institutonan.

Paradòksalmente e mesun falta di konfiansa den nos hendenan a pone ku e opshon di integrashon te ainda tabatin mas popularidat den referèndumnan ku den elekshon. Partidonan ku ta propagá integrashon no a logra presentá un bon programa ni hende kapasitá pa bende e opshon. Sea nan ta bisa ku nos tin derechi riba tur mangel di Hulanda/Oropa sin mester kumpli ku e debernan di Hulanda/Oropa, òf simplemente no ta kapta e esensia di integrashon. Kon otro por splika ku un partido pro-integrashon den Oropa (via UPG) por kampañá pa fòrsa pone un spiral den vágina di sièrto muhénan pa nan no haña mas yu?

Komo oradó na un konferensia di èksperto na Hulanda (2004), mi a atvertí kontra di e pensamentu (di entre otro dr. Mito Croes, dfm) ku si integrá den Oropeo, nos por negoshá tur tipo di ‘eksepshon’). Falta hopi informashon promé tuma un paso responsabel pa integrashon.

Si proponentenan di integrashon presentá hende serio i konfiabel ku transparentemente por splika tur bentaha i desbentaha di integrashon, e opshon lo tin mihó resultado na siguiente elekshon(nan).

Finalmente un atvertensia na ‘de politiek’. Bisti dashiki, mara bunita lensu di tela ‘kente’ na kabes, grita West Indische Compagnie no ta yuda outonomia. Si sigui maltratá nos outonomia dor di inkapasidat i ‘gràpsologia’ flagrante enbes di karga responsabilidat, sa ku boso ta oumentá e chènsnan di integrashon.

Willemstad, Kòrsou

Advertisement