Kòrsou, sigun opinionnan ta mas shushi ku nunka i ta pèstá ku djaka. Kontrali na loke algun ta bisa, no ta awor Kòrsou ta shushi, sino tin un mal reputashon pa basta tempu kaba.
Outoridatnan di Kòrsou na komienso di siglo pasá tabata man na kabes debí na kantidat grandi di sushedat, djaka i raton den nos suidat kapital. Sorprendente si ta e medidanan ku gobernantenan a tuma pa remediá e situashon indeseabel i alarmante den Punda, Otrobanda i Pietermaai.
Prokuradó General a publiká na 1908 un anunsio den kua e ta pidi pueblo pasa na Fiskalia ku mas tantu djaka i raton morto posibel. Fiskalia tabata paga un depchi (10 sèn) pa kada djaka morto i dos (2) sèn pa kada raton morto. Pa nos haña un idea, e tempu ei kuater (4) webu di galiña tabata kosta un depchi.
E kampaña tabata un éksito rotundo i a haña publisidat den hinter Reino. Sifranan ta mustra ku durante di e promé siman a entregá 219 djaka i 944 raton. En total a paga 20,000 florin lokual awe ta akivalente na Naf 3 mion. E kampaña a produsí algun shen mil djaka i raton. Tambe a eliminá lugánan di benta shushi ilegal den nos suidat kapital. Punda a resultá di ta e parti mas shushi di nos kapital. Finalmente tabata huma sierto barkunan di bela, prinsipalmente esnan ku tabata trafiká pa Venezuela, lokual a mata kantidat grandi di djaka i raton.
Willemstad, Kòrsou
Archivo Nashonal; Curaçao van Kolonie tot Autonomie, Dr. Joh. den Hertog; Suriname, Koloniaal Nieuws- en Advertentieblad, 14.7.1908
Alex David Rosaria Blog 