‘Day After’ COHO

Promé ku reunion di Konseho di Minister di Reino ayera, sierto aktornan tabata eufóriko, intoksiká ku adredelina pa bisa Hulanda bai flit ku su COHO. Sigur esnan ku den kampaña a primintí pa bari COHO fo’i mesa, prent Florin bai gol, plan B, aktivá Nashonnan Uní. Awe ta Day After i Fòrti a lanta ku un enorme ‘kater’ tratando di skapa e poko kredibilidat ku e a sobra.

Un kos ta sigur: a keda demostrá dikon nos outonomia ta na peliger (1). Kontrali na tur otro animal (hende ta animal humano), nos no sa di pone esnan mas talentoso na kabes. Ademas, nos no ta karga responsabilidat pero ta preferá hunga víktima i bisa ku “a fòrsa nos” akseptá COHO. Sigun otronan Raad van Advies (RvA) a brua tera ku su konseho sin realisá ku RvA a hasi su trabou normal den e proseso di un Rijkswet. Fòrti no ta realisá ku e a hasi esnan pro-provinsia un gran fabor? Mi tin bergwensa pa loke a pasa, pa èkspreshonnan bou di nivel di Fòrti i Kas di Kòrsou, i pa e silensio di e partido ku lealmente ta sostené tur kos.

Mi prekupashon mayó ta otro kaminda sinembargo. Mi ta duda ku e pakete aki lo yuda nos desaroyá (2). Plaka a dominá, pero no a definí direkshon, metanan di desaroyo, no a establesé ‘benchmarks’ i momentunan di midi. Manera mi a bisa aña pasá i ku awor RvA a konfirmá, e proyekto di reskate no tin nos stèmpel di desaroyo. Ku otro palabra, no tin ‘ownership’. Ademas e proyekto ke operá pa gran parti pafó di nos institutonan propio. Mi por komprondé Den Haag pasombra nos institutonan ta swak. Lokual si mi no ta komprondé ta dikon no tin un komponente fuerte pa drecha i krea kapasidat institushonal pa progresivamente nos hasi lokual COHO lo hasi. Ni e aktornan aktual den Fòrti ni esnan anterior desafortunadamente no a pensa riba e senario ‘kiko awor ora COHO stòp?”. Final di kuenta no ta esei ta desaroyo? No ta esei lo a hasi nos outonomia fuerte?

Willemstad, Kòrsou

(1) https://alexdavidrosaria.blog/2019/10/24/konta-ku-nos-outonomia/

(2) https://alexdavidrosaria.blog/2020/08/28/diskurso-tokante-pakete-knops/