Repudio

Repudiabel loke a bin dilanti e siman aki tokante di maltrato seksual kontra di algun mucha na un skol lokal. Mi ta lamentá loke a pasa i ta spera ku e víktimanan i nan sernan kerí (ku eventual ayudo sikológiko) lo rekuperá di e trouma ku nan a pasa aden. Mi no ta spera ku esnan responsabel pa e malechornan ta pone man riba nan kabes, tumando ehèmpel di Iglesia Katóliko.

Iglesia Katóliko i Obispado di Willemstad awe i den pasado semper a protehá nan pastornan, fraternan i religiosonan ku (t)a abuzá di mucha. Ta konosí ku nan ta pòst e maniaknan aki di parokia pa parokia òf manda nan un di e otro 5 islanan ku ta kai bou di Obispado. Ounke ta konosí ken e abusadornan aki ta, no ta tene nan responsabel. Pakiko Obispado no ta tuma medida, pero ta promé pa persiguí e grupo LGBTQ,, no pa un akto kriminal, sino nan preferensia seksual?

Mester persiguí kriminalmente tur esnan responsabel den nos komunidat pa abuzo kontra mucha, inkluso religiosonan. Ta basta ku hipokresia. Un Ombudsman pa mucha ta un nesesidat. Víktimanan di abuzo seksual hopi biaha nunka ta rekuperá kompletamente i algun ta ripití e aktonan aki, èkstendiendo e kadena di abuzo. T’esei nos ke pa nos pais? Mi no ta spera.

Willemstad, Kòrsou