Un tradishon diskriminatorio: bati Huda

Bati Huda ta un tradishon religioso Kristian na vários pais na mundu ku ta tuma lugá rònt di fecha di Pasku di Resurekshon. Un tempu esaki a keda prohibí na Kòrsou, pero e a gana na popularidat atrobe. Orígen di batimentu di Huda ta repudio di esnan ku ta kere ku e apòstel Hudiu, Hudás Iskarot, a traishoná Kristu, i pone ku eventualmente a mat’é. Aki na Kòrsou a prohibí batimentu di Huda algun siglo pasá hustamente pasombra e aktividat aki ta simbolisá deskriminashon religioso i sentimentunan anti-Hudiu.

Batimentu di Huda tabata tuma lugá na vários manera aki. Segun e.o. Pater Brenneker (Theologie van de Straat), tabata popular pa traha algun pòpchi grandi i pone nan sinta na vários kaminda ku un bòter di róm. Hopi biaha ta pone e pòpchi dilanti di kas di un famia Hudiu. Tur hende ku kana pasa por a dal’é un moketa den su kara. Ora solo baha, tabata marcha bou di müsik, kompañá pa alkohòl, kantando kanshonnan kontra di Hudás (‘kantikanan di bati Huda’) i asta tin biaha kontra e religion Hudiu, lastrando e pòpchinan den kayanan pa despues bati’é ainda mas te ora no sobra nada. Normalmente ta sigi un fiesta hopi animá.

Promé ku e aktividat di bati Huda manera Pater Brenneker a deskribí ariba, e tradishon aki a keda prohibí pa algun siglo. Bièrnè Santu 27 mart 1682, manera kustumber a bati Huda den serkania di Bahia Santa Ana. E loke a kousa konsternashon ta ku e Huda a resultá di ta un representashon idéntiko di e Rabino di Hudiunan di Kòrsou. Gobernadó ku ya na vários okashon a atvertí pa intoleransia religioso, a konsiderá lokual a pasa inakseptabel i via dekreto a prohibí tur aktividat di bati Huda. E prohibishon a dura pa algun siglo.

Na 2019 World Jewish Congress a mustra su oposishon pa batimentu di Huda despues di imágennan di batimentu di un pòpchi bistí komo un Hudiu òrtodòks. Esaki a tuma lugá na Polonia. E batidónan, kasi tur Katólikonan, a kita su kabes afó i tira esaki den laman i kima e resto di e kurpa di e pòpchi di imágen Hudiu.

E siguiente pregunta ta surgi serka mi: Si nos komo komunidat no ta tolerá e invento di Hulanda di ‘zwarte pieten’ pasombra e ta deskriminashon flagrante di hende pretu, nos ta keda silensioso pa loke ta trata un tradishon lokal ku ta flagrantemente anti-Hudiu?

Willemstad, Kòrsou

Fuente: Archivo Nashonal, Kerkgeschiedenis Antillen, Pater Brada (1963).

Advertisement